王若琪遍尋療法：唔想阿媽坐一世輪椅！

事隔兩年，王若琪（Takki）再度出新歌《世人笑我太瘋癲》，坦言去年經歷很多不開心的事：「媽咪感冒導致肺炎，跟住仲入埋ICU個幾月，直頭昏迷咗！雖然醒番但又發現左腦中風，依家半邊身唔係太郁到，講嘢都唔係好表達到。」至親入院，Takki惟有停工守在醫院，照顧危在旦夕的母親：「佢插咗喉好辛苦，又要綁住佢隻手，驚佢有咩事冇人知。」直至聘請專業人士幫手，她才可以繼續音樂事業。說到花掉母女不少積蓄，她慶幸除了唱歌外，尚有教學工作：「香港歌手淨係做音樂比較難生存，乜嘢都做吓，亦都係喜歡嘅工作，仲撐得住。」

喪父心中有愧

數年前經歷喪父之痛的Takki，曾經非常迷失與自責，認定假若能夠賺多點錢，或有機會救回患肺癌的爸爸，事後曾以不太適合自己的女性形象接拍廣告，目的就是賺錢：「當時覺得對爹哋唔住，到媽咪有事，原來一個感冒可以變成咁嚴重，我覺得咁點解唔去做自己喜歡嘅事？條路始終係我嘅，開心最緊要。」媽媽發病至今近一年，依然食得瞓得，總算慢慢有進步，Takki說：「好多醫生或者物理治療師話佢成世要坐輪椅，但我唔信邪！我同細佬不斷搵治療，一個星期做三次針灸，希望佢有番活動能力。」媽媽的病更成為兩姊弟加深溝通的橋樑，Takki形容一家人喜歡嬉笑怒罵：「唔想大家太傷心，我有時服侍媽咪，細佬會話：『勁喎！第時冇嘢撈就去老人院做啦！』我同細佬多咗好多互動同商量，多謝佢分擔咗好多。」

王若琪慶幸姊弟同心，一起幫媽咪尋找療法。	王若琪指母親病況趨穩定，於是重拾結他推出新歌。	王若琪近日重現幕前，與糖妹出席活動。

感受人間有愛

Takki現時親自負責歌曲、形象與聯絡等工作，避免出現「衣不稱身」的情況，她說：「以前有啲嘢唔係自己嘅，好似爸爸走嗰時寫咗首歌，但好怕講出嚟，驚人哋覺得我借呢件事做宣傳、做新聞，但依家諗通咗，我好想同大家分享，屋企人有病係成家嘅事，每一個人都要面對。」她早前在社交平台寫了一篇長文抒發心情，沒想到很多人因此介紹醫生給她：「老土啲講真係人間有愛！」

文：音樂組

化妝：Melody Chiu

造型：Fame Glory

服裝：Agnes' B

鞋：Giuseppe Zanotti