樂詠琳未唱先演箏上位
有「翻版謝安琪」之稱的樂壇新人樂詠琳（Charlyne），甫出道獲公司安排到內地拍攝古裝片，又吊威吔又打交，小學已學彈古箏的她，計劃先累積演出經驗及人生閱歷，再將感情融化到樂聲之中，Charlyne坦言會以樂壇天后容祖兒為奮鬥目標。
Charlyne以古箏展現她宜古宜今的一面，她說：「大家好，我係Charlyne樂詠琳，係2017年樂壇新人，將會向歌影視多方面發展。由小學四年班起我就學古箏，另外為咗應付音樂發展嘅需要，我學緊結他、K-pop舞蹈，等大家可以睇到快歌、慢歌動靜皆宜嘅一面。之前我去過台灣出席大型音樂活動，面對過萬觀眾，心情好緊張，氣氛好高漲。（想一個人做主角？）希望有咁嘅機會，但都享受一大班人同台嗰種音樂熱誠，我本來喺大學讀咗年幾翻譯，難得被賞識入行，依家停學，試吓發展，我想以容祖兒做自己嘅奮鬥目標！」
特訓做打女
雖以樂壇新人身份出道，但Charlyne卻被安排先拍電影：「公司安排我稍後去北京拍古裝戲，要吊威吔同打交，我一向手腳唔協調，為拍戲要接受特訓，我唔驚受傷，因為本身都好動，鍾意玩手球、排球同跑步，相比起唱歌，我更鍾意演戲，因為演戲可以將我文靜、好動、男仔頭嘅多方面表達出嚟，嚟緊一年我會有好多工作，希望大家多多支持！」
文：影視組
攝：李柏儒
服裝：BLIND BY JW
場地：My Day @ Mira Mall