謝芷倫童年音影誓嫁鋼琴王子

藝人謝芷倫（Jan）演出《愛回家》系列中的斯文OL，現實中的她一樣斯文，嗜好也離不開鋼琴與芭蕾舞，名副其實是個多才多藝的文靜女生！Jan自言童年時學琴，全因「情竇初開」：「大概4歲嗰陣，我同媽咪經過商場，見有個哥哥背住我哋彈琴，我睇咗好耐，發誓第時要搵個識彈琴嘅老公！之後我就開始學琴，學到中三、四，就算入咗行都有教琴，因為太鍾意彈琴，唔捨得！」

問到是否已找到一個會彈琴的未來老公？Jan笑說：「音樂朋友就識好多，但彈琴男友就未有。（因為鍾意咗跳芭蕾舞嘅男生？）雖然芭蕾都係4歲嗰陣學，但純粹係自己想學，每個女仔都幻想自己係公主，我都一樣，所以揀咗芭蕾，嗰時一星期練足六日，腳趾包晒膠布，傷晒都繼續練，瘦到101磅變皮包骨，直到後來去到好艱辛嘅程度至冇練！」

帶挈客串網劇

Jan較早前獲得在鏡頭前一展舞技的機會，她說：「之前朋友叫我客串內地網劇，要我即席跳一段芭蕾舞，我即刻應承！因為一直都好想喺鏡頭前跳舞，但係拍攝場地唔算好大，劇情仲講有好多人圍住，我都諗咗段可以用晒全個場嘅舞嚟跳，順利完成咗場戲！其實嗰次舞衣唔啱身，鞋又唔舒服，係個挑戰！不過對比練舞嘅辛酸，都唔算係啲乜！」

謝芷倫自幼學跳芭蕾舞，最後因超艱辛訓練而放棄。	謝芷倫早前客串網劇，一展舞技。	謝芷倫經常在劇中演OL，不乏性感演出。

文：影視組

場地：Music Lab Education Center

髮型：Nicki Ting

化妝：Shirley Lee

服裝：Urban Cottage、Zalora