汪明荃落Order撐場禁羅家英接Job

有「汪阿姐」之稱的汪明荃(Liza)屹立演藝界50年,今年8月27及28日在紅館舉行《50周年The Timeless Concert》演唱會,將過去50年走過的演藝歷程及經典金曲一一呈現舞台,讓歌迷穿越時空,陪伴Liza華麗轉身迎接70年華。

由70年代的電視劇開始,汪明荃(Liza)已是當家花旦,由《家變》洛琳到《京華春夢》賀燕秋,還有《千王之王》系列、《楊家將》及近年的《我的野蠻奶奶》與《華麗轉身》,令人印象深刻,由她主唱的劇集主題曲更是首首經典!

除了電視演出,Liza亦醉心及致力推廣粵劇傳統藝術,贏盡讚賞。在演藝圈跨過半世紀的她為慶祝這大日子,早在一年前已構思及籌備今次50周年演唱會。

Sexy冇底線:夠膽就得

已有十年未在紅館開個唱的Liza表示,會將演藝人生分不同階段放上舞台:「每一個十年嘅段落、一個經歷,好似講古仔咁話畀大家知。(金曲咁多點揀?)首歌一定係好聽先咁多人鍾意,而唔同年齡,亦有唔同階段去體會,感情演繹上自然有不同。」歌曲有監製安排,Liza的華麗造型則交由好友陳華國操刀,問到華麗中可有性感底線?充滿阿姐風範的Liza說:「冇所謂o架!夠膽着就得。(今次個唱有冇壓力?)我嘅壓力煲都係有嘅,做咗幾十年都係咁,將問題快啲解決就唔會有壓力囉!」

適逢8月28日第二場是Liza的70大壽,但她透露Rundown上沒有特別安排慶祝,至於歌迷屆時可有驚喜?她說:「都唔需要,因為佢哋支持我50年,入場已經係好好嘅禮物。」Liza保養得宜,樣貌根本看不出歲月痕迹,生日願望是否想青春常駐?她說:「呢個年齡仲要求啲乜嘢!健康最重要,同埋開心囉!」

當開大型Party

今次個唱,老公羅家英奉命撐場,Liza笑說:「咁佢一定要啦!(This is an order?)係啊!接咗呢個Order,唔可以接其他Job。」有家英哥做背後的男人打點一切,亦會為她踩台板唱戲曲,Liza僅漏口風:「會唱!少少啦!」今次再到紅館開騷是否有情意結?她說:「其實邊度冇所謂,大場有大場做法,但係50周年呢個階段就想開一個開心嘅大型Party。」除了演唱會,Liza亦會舉行一個50周年的回顧展,故戲迷要睇粵劇就要留待明年。

文:音樂組

攝:劉斌

場地:Hotel Icon

化妝:Stephen Lau

髮型:Bowie Lo

服裝:Harvey Nichols

首飾:六福珠寶