譚耀文下一步做導演！

阿譚早前為「第四屆全港中學微電影創作大賽」任頒獎嘉賓，他坦言有個導演夢：「我一直想做導演，電影或MV都有興趣，已經度咗一、兩個故事，完成咗大部分，差分場未完成，依家欠嘅只係時間，但冇得急，遲吓會嘗試搵投資者，總之我下一步嘅目標係『導演』！（自導自演？）唔會刻意為自己度身訂造劇本，表達咗想講嘅故事先，有啱我做嘅角色至會演，題材會係關於香港本土同有鼓勵性嘅。」

歡迎中學生邀合作

阿譚亦渴望與中學生合作：「對比我讀書時去澳門拍微電影版『教父續集』，嗰時真係好Overact！（中學生可找你演出？）OK！劇本好，有意義嘅，可以夾時間，我會參與同支持，佢哋好需要幫助！」

後悔冇入劇社

阿譚回望往昔，後悔冇及早向演戲之路進發：「讀書嗰陣我冇入劇社，因為嗰時我對唱歌興趣大啲，演戲係因為圍內有幾個志同道合嘅朋友走埋一齊至開始玩，嗰陣有演過王子與公主，有戴過金色假髮扮女人，笑到大家碌地！如果畀我再揀，我會揀中學時代多啲參與戲劇，因為好電影如《教父》、《舒特拉的名單》、港產片《英雄本色》、《黃飛鴻》等，可以帶畀觀眾好多回憶！」

（左起）：譚耀文、鄭嘉穎、謝天華 阿譚早前參演《風雲5D音樂劇》。	放大圖片	阿譚表明會支持及參演中學生作品。

文：影視組

攝：劉智源

服裝：Dorian Ho Homme