李家鼎被孫仔送吻冧暈

藝人李家鼎及黎美言（Winkie）前晚於尖沙咀出席長者煮食活動。鼎爺透露已與家人提早食飯慶祝父親節，席上獲孫仔送吻，令他冧到暈：「食咗飯啦，再煮太辛苦。（要咩父親節禮物？）家人平安，身體健康，孫仔快高長大、聰明伶俐。（孫仔錫你？）錫咗我啦，冧到依家！」問性情豪邁的鼎爺有否不慎嚇親孫仔？他笑說：「佢開頭唔驚，但佢知道一扭計就會畀我望實佢，依家佢識移開視線。（第日教孫仔打功夫？）睇吓佢鍾唔鍾意，逼佢都冇用。」