高海寧：我使逼婚？
藝人高海寧（高Ling）與譚凱琪昨日出席活動，有傳高Ling向緋聞男友鄧智偉逼婚不遂陷冷戰，她霸氣反擊：「我使逼婚？唔係呀嘛？」明言得啖笑，果然索女唔憂嫁！
藝人高海寧與譚凱琪（Zoie）昨日在旺角出席手袋活動，高Ling更大騷事業線及纖腰，造型性感。提到有報道指她向緋聞男友鄧智偉逼婚不遂，兩人因此陷冷戰，她霸氣反擊：「我使逼婚？唔係呀嘛？（同鄧智偉冷戰？）呢單嘢得啖笑。」
想擺脫「咪神」稱號
活動上，高Ling笑言近日為了拍攝纖體廣告努力減肥，問到會否擔心上圍縮水？她坦言想擺脫「咪神」之名：「仲想再減多5至8磅。（唔驚減埋上圍？）均勻緊要啲！（唔做『咪神』？）我希望擺脫呢個名，依家有好多新人，自己唔可以淨係孭住一個名，想畀人話係個好演員。」而鄧智偉昨日亦接受本報訪問，未知是否與高Ling夾定口供，他否認被逼婚：「佢邊度使逼婚呀！想同佢結婚嘅人好多，有條件嘅亦有好多，追佢嘅都排晒隊啦！」
譚凱琪心急生B
至於Zoie透露出門時遇上九龍塘驚現懷疑炸彈裝置事件，所以姍姍來遲：「出門嘅必經之路被封路。（遇炸彈驚唔驚？）驚，原來危險物品咁近！（同男友報平安？）我主動話佢聽有件咁嘅事。」此外，提到日前揚言打算兩年後結婚，她表示未獲男友正式求婚，亦不會在今年閃婚：「好正式求婚就未，但有講吓。啲人話追、求、訂、結、離。『離』就唔好喇，『嚟』就嚟個小朋友啦！」
文：影視組