寶貝女送按摩椅孝敬方中信冧晒！

近年工作多籮籮的方中信（Alex），雖然曾與合作多年的鐘錶廣告商有所誤會，但最後和氣收場，廣告商還力邀續任代言人，圈中如此有型又有實力，可謂長做長有！雖然工作超級忙碌，但Alex不忘陪伴老婆莫可欣，昨日便被發現與老婆去尖沙咀Shopping，期間到一間售買按摩椅的店舖閒逛。「暖男」方中信先讓老婆莫可欣試坐，他則在旁向店員了解產品詳情，之後再到另一邊試坐另一張，最後爽快地扑槌！選購心頭好後，Chok足全程的方中信繼續雙手插袋堅係型，而莫可欣則翹實老公恩愛離開。

莫可欣「包底」

事後，記者致電莫可欣了解，原來是她幫9歲女兒迦晴買禮物送給父親方中信，她說：「迦晴見到爸爸工作咁辛苦，所以之前同我講話想用佢儲咗九年嘅利是，買張按摩椅畀爸爸做父親節禮物！佢仲好細心揀咗一張叫『白馬王子』系列嘅按摩椅畀爸爸，不過佢放學仲有啲課外活動，所以叫我幫佢買。」莫可欣得知女兒有此心意，坦言十分安慰，但不忍女兒耗盡九年利是錢買禮物，故「象徵式」收女兒數百元，餘數由她包底！如此「母」慈「女」孝，Alex梗係甜在心頭！

莫可欣受女兒所託，帶方中信買父親節禮物！	方中信先讓老婆莫可欣試坐，自己就向店員了解詳情。	揀到心頭好，莫可欣翹實方中信開心離開。

放工攬囡最窩心

記者致電Alex，對於女兒這份心意，他當然冧到爆，但為保持形象只搞笑地說：「我都知頭先有人影我！禮物呢……都係『羊毛出自羊身上』啦！因為佢啲利是錢已經做咗基金，郁唔到！不過我都想坐吓按摩椅嘅！（禮物好啱心水啦？）哈哈……張椅原本想放喺新屋嘅，但老婆話都係放番喺舊屋，因為個女喺舊居嗰頭返學，都係喺嗰度多啲。（咁錫個囡？）冧晒啦！我無欲無求！（父親節點慶祝？）同埋啲做咗爸爸嘅朋友食飯，幾家人咁一齊食。（同太太少機會拍拖行街？）都唔係嘅，成日出去一齊食飯。」除了以利是錢送禮物外，問到覺得女兒做甚麼令他最窩心？Alex說：「做完嘢返屋企，佢會跑埋嚟攬我，我諗好多爸爸都係咁！」

文：影視組