黎芷珊違泊塞爆中環
無綫藝人黎芷珊被網民發現昨午於中環違例泊車，更搞到巴士駛到該處未能轉彎，令到交通癱瘓，結果驚動警方到場。她對自己造成的混亂場面衷心致歉，直言今次是個大教訓，自己不會再犯錯，希望各駕駛者以她為鑑，遵守交通規則。
有網民「全程直擊」黎芷珊昨午在中環威靈頓街違例泊車，令該處交通癱瘓，更有巴士未能轉彎，後面三條街車輛全部頂死晒，進退不能之下引致附近交通癱瘓。目擊者將相關照片及短片上載到「香港違泊全紀錄」fb群組，並留言「狂插」芷珊：「兩位差人到場嘗試聯絡車主但對方唔聽電話……幾分鐘後個女司機先至喺蘭桂坊落番嚟……然後個女司機若無其事咁上番司機位慢慢等差人抄佢牌。」
開腔認衰 唔會有下次
記者昨晚與芷珊取得聯絡，她甫開腔已承認錯誤：「非常抱歉，成件事係我唔啱，因為今日喺中環有Job，我點搵都搵唔到停車場可以泊，塞車又塞咗好耐，一睇錶發現自己遲到，先一時心急泊咗喺嗰度，但當時冇發現會阻住巴士轉彎！今次係一個好好嘅教訓，我承諾一定唔會有下次，希望大家唔好學我！」
芷珊又指亦有留意社交網的「報道」及「評論」：「無論咩原因都好，都唔應該咁做。我第一時間都上咗網站留言Say Sorry，但有兩點我覺得需要澄清。第一係我冇唔聽警方嘅電話，第二係佢哋條片都睇到嘅，我聽警方講完嘢後即刻『耍晒冧』，並唔係佢哋所講嘅『若無其事』。」
文：影視組