唔敢床戰女神夏文汐 黎耀祥：我哋呢啲斯文，唔好嘞！
黎耀祥、麥長青（麥包）與江美儀等昨午出席「仁濟50金禧嘉年華」。下月將「歸隊」開拍無綫新劇的祥仔，今次獲安排與年輕時心目中女神夏文汐合作，他大讚對方型格十足，但因忙於舞台劇巡迴公演及內地商演，祥仔表示暫未知角色詳情。當問到會否特意向監製要求加插床上「動作戲」，祥仔笑說：「唔好嘞，我哋呢啲斯斯文文，鬥吓文戲咪好囉。暫時淨係知全劇35集，拍到今年10月。（約對方食飯見面？）咁又唔使，遲啲有造型，造完型公司例牌一齊食飯。」祥仔又自爆10月將有機會首次返內地拍劇，記者指他酬勞高時，他風騷笑說：「到時話你知！」
麥包江美儀節目受衝擊
另外，麥長青與江美儀主持節目《關你家事》引起回響接獲投訴。二人異口同聲表示：「我哋有問過監製，但原來佢未接到通知，所以唔知投訴內容。」江美儀坦言節目形式創新，事先已預料會有衝擊：「可能觀眾睇睇吓會接受，跟住變追睇呢。」麥長青則自爆在街上被人質疑節目真確性：「問我啲嘉賓係咪臨時演員，但其實佢哋係人生導師Elsa嘅求助個案。佢哋肯上節目係想分享經歷同修補與家人嘅關係。近日我獲邀探訪問題家庭，佢哋有啲連屋企人都唔理解，啲個案真係可以拍成電視劇！」對於節目會否添食，二人表示暫未接獲通知。
