馮盈盈險被撇 兩蚊化解
應屆港姐馮盈盈昨日出席港姐召集活動，剛度過23歲生日的她，生日禮物收到醫生男友送的高踭鞋，卻懵然不知「送鞋」意指「請對方走」，她指男友一心想送實用物品，如今盈盈獲悉寓意後，決定火速畀兩蚊男友當自己買！而陳凱琳則透過社交平台分享選美心得。
馮盈盈、莊思明（Lisa）、陳凱琳（Grace）等昨日出席《2017香港小姐競選》最後召集活動。剛於前天（10日）度過23歲生日的盈盈，穿上男友送的高踭鞋生日禮物現身，透露早前與細佬到東京旅行慶生，笑言此行感覺像去冒險，返港當日更因瞓過龍，差點趕不及上飛機。
男友送高踭鞋作生日禮物，記者指送鞋是暗喻「請對方走」，盈盈聞言表現愕然：「係咩？我唔知喎，佢覺得實用，又知我鍾意呢個牌子先買，咁我要跟習俗，畀番兩蚊佢當自己買囉！」盈盈更指男友亦有飛往東京會合他們，由於早前她與男友被影到在街頭咀嘴，東京行可再咀？她笑說：「我哋好專注買嘢同食嘢，都有留意個Kiss報道，仲多角度影，同事笑我咁都發現唔到，可能放假心情輕鬆就鬆懈咗！」
陳凱琳網上搵靚女
思明表示當年當選後，曾建議孖生家姐莊思華參選，惟對方最終縮沙，其男友楊明為今屆港姐拍宣傳片，會否擔心他趁機(目及)女？思明即說：「呢個選美盛事好正經o架！（平時佢(目及)女會同你講？）我諗佢應該唔夠膽望，佢都好少一個人喺街。」至於Grace則說近日在社交平台與有意參選的靚女們分享心得：「我今年冇人介紹，但有好多靚女私訊問我要準備啲乜，我都有覆佢哋。」此外，評判蔡一智因傷缺席，改由C AllStar頂替。
文：影視組