諸葛爆老公癖好愛另類香味
名媛諸葛紫岐（Marie）、藝人陳凱琳和陳敏之，昨日出席《Montblanc Lady Emblem L'Eau 香水發布會》。Marie表示自小受媽咪薰陶愛上香水，覺得香水味令心情好，但覺得媽咪一款香水有十幾支不同大小感到浪費。她直言老公薛嘉麟最愛她本身的味道，更大爆老公誤噴洗手間香水，她說：「佢唔識揀香水，噴咗後個味好strong，先發現原來佢用咗噴廁所嗰啲香水，所以叫囝囝（薛華韜）父親節送香水畀爸爸。」問到愛兒會否出外讀書？她表示兒子得3歲半，大個先會去外國，但暫不考慮英國。她透露早前到巴黎有請當地保鏢，怕不安全及被人搶劫。
陳凱琳笑男友反串
此外，問到陳凱琳對男友鄭嘉穎為內地真人騷反串做「新娘」的睇法，她表示好好笑，幸而男友夠man，減少尷尬。問到會否情侶檔接真人騷？她表示有興趣，笑言扮甚麼都可投入角色：「醜化都唔介意。（你扮男，佢扮女？）咁絕，都好玩。（直播24小時生活？）太激進，要私人空間。（五千萬酬勞？）到時先算。」
陳敏之為仔乜都得
而陳敏之透露餵母乳半年，為兒子健康，目標餵一年：「餵母乳又冇得瞓，要戒口，係好偉大工程，我拍劇都餵到奶，爭取lunch time泵奶，又會叫導演畀15分鐘泵奶，做咗神奇女俠！有血有淚，滴滴都辛苦，見到佢笑，就會覺得好值得。」
文：名人組