秋官踢爆有喜？圓潤松松：唔講得
賈思樂尾場演唱會大玩爆料，先有鄭少秋（秋官）恭喜身材圓潤的陳松伶「有喜」，後有賈思樂被踢爆追過陳玉蓮，更被追問可有上過床！
入行40周年的歌手賈思樂（Louie）前晚在文化中心舉行尾場《賈思樂ME & MY GIRLS in Concert 2017》，吸引不少圈中人捧場，如鄭少秋夫婦、黃日華夫婦、梁小冰、陸詩韻、寇鴻萍、露雲娜夫婦及顧紀筠兒子陳浚霆等。Louie邀得多位好友擔任嘉賓，包括陳松伶、李樂詩、韋綺姍、林建明、顧紀筠及盧海鵬，當中盧海鵬更反串扮徐小鳳。松松以一襲心口有薄紗的Deep V裙現身，與Louie又跳又唱《Can't take my eyes off you》，最後更咀嘴。獨唱時，松松跟台下秋官打招呼，秋官卻突然恭喜她有喜，松松即笑說：「雖然我肥啫！但未有喜。」
感激老公支持
受訪時談及此事，松松說：「我有咗……乜好呢！（佢點解以為你有咗？）唔適當時機唔講得。」現年46歲的她坦言與老公想生小朋友：「有喜話畀你哋 聽，其實試過好多方法，例如雪卵，但要睇緣分。（依家未有BB？）未有。」並透露想領養小朋友。談及被契姐出自傳力數一事，她表示老公很支持她，而她最初對事件消化不到，但現已沒影響心情。
Louie被爆追過陳玉蓮
至於林建明則在台上爆料，問Louie是否追過陳玉蓮，Louie承認有，她再追問可有上床？Louie即指她夠鐘食藥！騷後Louie表示見到蓮妹亦不會介意：「依家同蓮妹係好朋友，幾十歲人介咩意，呢啲得就得，唔得就唔得，可以做朋友。」談及唱《明星》時感觸落淚，他直言此曲是「死位」：「大家40年嚟冇遺棄過我，同埋真係唔知仲有冇機會再做，但最緊要呢40年No Regret。」林建明則笑言爆料只為搞笑，談及好友鍾慧冰患脈管炎，她說：「佢睇好多種醫生，好進步。（佢心情點？）好啲時就開心啲，差啲時就情緒低落。」
文：音樂組