田蕊妮遭拔槍恐嚇Call杜汶澤救命
杜汶澤在電視節目中與江若琳大談返內地工作的難忘事，阿澤驚爆多年前太太田蕊妮獲邀到內地登台，當地老闆打算唔畀錢，更拔槍威嚇阿田，驚青的阿田強裝鎮定，趁機打電話搵老公求救，過程驚險！
藝人杜汶澤在奇妙電視節目《杜汶澤食住上》中，每集都有驚人搞笑爆料，新一集請來曾合作電影的江若琳（Elanne），兩人食住辣餸大談返內地開工的光怪陸離事。
「唔知支槍真定假」
Elanne重提年前在內地工作後離開，被司機趕落車的慘爆經歷。阿澤則爆太太田蕊妮多年前拍畢亞視劇《縱橫四海》後人氣大增，獲邀到內地二線城市登台，豈料到埗後老闆竟賴帳，打算不給酬勞，更拔槍放在枱上威嚇阿田！阿田表面扮鎮定，大膽說：「都唔知你支槍真定假嘅！」實則非常驚青，並趁機致電阿澤求救，過程驚險！
阿田與阿澤提起此事都三緘其口不欲詳細多談。雖然他未肯透露詳情，但指阿田最終成功收到酬勞並完成演出。
曾搶余文樂單車
阿澤在節目中又爆與余文樂「識於微時」，當年他讀中學時，在元朗一便利店外見到一名細路踩單車，即上前搶單車更作狀要打對方，原來該名細路是樂仔。樂仔入行後提起此事，阿澤才驚覺曾欺負對方，大讚樂仔大方唔記仇。此外，阿田昨晚上載一張與阿澤的合照，食飯慶祝結婚12周年紀念，還稱呼阿澤做「北野武先生」。
文：影視組