欣宜 安儀 努力有明天打贏逆境波
樂壇「女神」鄭欣宜昨日和世界女子桌球「Cue后」吳安儀聯同組合C AllStar出席「We Like HK」舉辦的「努力有明天」記者會，擔任活動大使的眾星在台上分享為目標努力不懈的故事。欣宜講到當初創業搞曲奇餅生意時被人潑冷水，嬲到Pat Pat都着火，而安儀亦稱曾因打桌球表現不好而感迷失，最後獲教練鼓勵而贏得桌球世界冠軍。
鄭欣宜、吳安儀及C AllStar以大使身份在台上分享奮鬥史，當中既是藝人又是曲奇店老闆的欣宜，稱兩年前將整曲奇餅的興趣變成小生意，但創業期間遇過不少難關，當時她打算到一個商場開Pop-up Store，與商場代表開會，對方連一口曲奇都未咬過，就已經向她潑冷水說：「咪以為係明星就會多人嚟買！就算你日日落舖都未必撐得到。」欣宜坦言為此感到很不開心，雖覺得不被對方尊重，但都多謝對方「袋錢落佢袋」，她因而更加努力要做好，認為堅持才是最重要，欣宜指當時開完會後，形容嬲到她Pat Pat着火，幸好她沒有放棄，繼續聯絡不同商場及開會，最終成功開設Pop-up Store。
「Cue后」都匿埋廁所喊
欣宜表示曲奇店前後開了四次Pop-up Store，之前更開了首間地舖，她表示努力堅持和珍惜每一個支持你的人最重要。問到當年的商場豈不是走寶？欣宜大方說：「如果有機會都想合作，佢個商場位置好，人流又高嘛！」
而「Cue后」吳安儀亦分享未成為世界女子桌球冠軍前，曾經歷迷失的日子：「試過有段時間迷失咗，比賽打錯一個波會鬧自己打得差，又試過練波時候打得唔好，會匿埋廁所喊，當時有問教練我係咪唔適合打波，但教練同我講：『你要鍾意先會打得好，唔去享受過程點打得好？打失一個波唔係世界末日，反而係畀機會你去改善唔好嘅嘢！』之後自己就慢慢打番好。」
至於安儀稱都有聽欣宜唱的《女神》，亦很欣賞她。問到可想和欣宜合作？她說：「我鍾意唱歌o架，但唱得好難聽，或者佢教我唱歌，我教佢篤波啦！」問到最想拍哪類型廣告？安儀稱經常出外比賽，故信用卡、航空公司或行李篋都適合。談到眼鏡廣告，有「四眼Cue后」花名的安儀笑說：「係喎，都可以呀！」
文：音樂組
攝：吳文聰