JW陪男友拉頭馬揼心呻冇買
歌手JW（王灝兒）昨日「公私兩忙」，先到沙田馬場拍拖陪圈外有米男友葉韋彤（Tarzan）拉頭馬，更首度公開在傳媒前合照，之後再趕下場出席假中環舉行的音樂會，對於連趕兩場，JW笑言是好充實的一天，又稱是男友好友的馬匹勝出，她只是陪男友入馬場支持。
問到她這次可有斬獲？JW則說：「我唔記得買呀，掛住好興奮喺度傾偈，唔記得買獨贏，好揼心！全部朋友都有買，男友都買咗，個個朋友都好開心，要佢請食飯。（買咗幾錢？五位數？）冇，少少啫。小賭怡情。（等男友嘅馬匹出戰先落重注？）唔係，都冇乜重注啦。」
大讚外形完美
講到JW和男友在馬場合照後，不少人都討論女的嬌小、男的魁梧，身高、體形有很大差別，JW冧爆說：「其實男友都話鍾意我嬌小玲瓏！（你都有肉地喎，冇叫你減肥？）冇喎，佢就係鍾意我咁嘅高度同身形。（好有自信？）係佢畀自信我嘅。」問到是否同樣欣賞男友的外形？JW冧滋滋說：「我好鍾意，覺得佢好Perfect！」
問到可有興趣做馬主？JW指未有打算：「養一隻馬要好多步驟，都係湊熱鬧OK啦！（叫男友送隻畀你？）咁我寧願佢送第二啲嘢。（到時改愛駒個名為歌曲名《矛盾一生》？）叫矛盾唔係咁好噃，佢有時間陪我就得啦。」
文：音樂組
攝：張福宏