千嬅搞大齡女組合
楊千嬅、林兆霞及陳逸寧於電影《春嬌救志明》中的組合MKB48大受歡迎，三人昨日於九龍灣出席電影原聲EP簽名會，千嬅表示其公司未有女子組合，希望有機會推出正經的音樂，更笑言叫公司同事攞bonus賭一鋪。千嬅稱假以時日三人會登台走埠，出唱片、拍電視劇。
提到她於社交網站以「超齡妙麗」造型為今日五歲生日的囝囝Torres慶生，她笑說：「『大齡女』囉！39+4呀！」又即場分享偷拍Torres在車廂唱戲中插曲《傳說》的片段，笑言歌曲變成兒歌：「我諗Raidas同林夕冇諗過《傳說》咁多年後變咗兒歌。（佢嘅同學都識唱？）懷疑有啲都識，佢哋啲阿媽都一齊唱。（唱你啲歌？）都識，但佢喺我面前唱人哋啲歌。」