卓林晨早上門 密會紋身Pink Lady

養兒一百歲，長憂九十九，母親每日都擔心仔女是否食得飽着得暖，尤其仔女正值青春期，更要擔心其學業及交友問題。單親媽咪吳綺莉（Elaine）三月時因女兒卓林的交友問題致母女起衝突，更涉嫌刑事恐嚇被捕。Elaine當時接受訪問透露，卓林經常帶一名年約30歲的女子返家過夜，兩人會關上房門，又指卓林疑沾染一些「奇怪行為」，白天沒有精神甚至不上學，令Elaine擔心不已！其後女兒入院留醫更令Elaine愁爆，一度聲淚俱下求女兒回家！

留宿近一個月

近日出院的卓林終返家重投母親懷抱，兩母女有講有笑重修舊好，但「交友問題」似乎仍未解決。最近有讀者報料指卓林出院後，繼續與該名外籍同性好友過從甚密，據知該密友是生活在香港的加拿大籍網絡紅人A小姐，其社交平台不乏濃妝自拍照似足洋娃娃，又不時大晒性感照，予人野性感覺。早前曾有雜誌介紹「日系網紅」，指A小姐曾是一名幼稚園教師。據知，卓林與A小姐相識大半年，A小姐對卓林關懷備至，兩人關係迅速昇華，卓林對她言聽計從，習慣喜好及性格都受其影響，A小姐更曾斷斷續續在卓林家留宿近一個月。

昨日卓林一早乘的士離開屋企，約9時半被發現步入灣仔一幢舊樓，該處正是A小姐的住處。卓林逗留近六小時，兩人共處一室至下午約2時50分，終於落樓買嘢食醫肚。卓林與A小姐前後腳步出，身穿黑色長身恤衫及爛牛仔褲的卓林，因天氣炎熱而摺高衫袖，不介意左手近二十條傷痕曝光。而A小姐則身穿粉紅色迷彩衫，手臂有卡通紋身及拎着香煙。前日剪走煩惱絲的卓林心情甚靚，不時撥弄短髮，與A小姐全程有傾有講。卓林一度踎低縛鞋帶，A小姐亦在附近耐心等候。全程卓林警覺性十足不時左右望，兩人一支箭步入一間餐廳，但坐低後未知是否唔啱口味，兩人突然離開，再買生煎包返回A小姐寓所，直至截稿前仍未見卓林離開密友寓所。

兩人全程有講有笑，A小姐更不時冧笑回望身後的卓林。

警覺性十足的卓林，步入餐廳時亦不忘左右望。

免費補習數學

對於女兒與A小姐見面，昨晚Elaine接受本報訪問時表示認識A小姐，指對方是卓林的補習老師：「我個女數學唔係幾好，佢同我講呢個女仔冇咗份工，仲話唔收錢幫佢補習，我話唔可以咁，佢有嚟我屋企補習，佢哋係朋友。（出院後卓林成日見呢個女仔？）有見，佢有同我交代過。（個女仔有喺你屋企住過？）間唔中都有。（你覺得卓林有冇學壞？）都冇，佢出院後都好好，同我有傾有講有交流。」Elaine昨日更在微博留言：「感恩我經歷您童年的每分每秒。」她表示只是一時感觸有感而發：「我自己係基督徒，公公係牧師，早排因為個囡情緒麻麻哋，其實做人最緊要閂埋門一家人平安開心，每個人大個都未必黐住媽咪啦！好彩個女由細到大都係我湊住，唔係就好似成世都冇相處過，好彩以前帶過佢去樂園，依家佢睬我都傻！」

卓林坐低後狂撳電話，未知是否向媽咪報告行蹤。

昨晨約9時半卓林乘的士到灣仔A小姐住所。

文：影視組

攝：追蹤組、攝影組