陳君宜水母「炸」面怕留疤

名媛陳君宜和翁嘉穗昨日為時裝設計師好友何國鉦補祝生日，陳君宜素顏現身中環的點心店，臉上和頸上均有一條條紅痕。她透露早前與老公鄭躬明到西貢游水時，慘被水母「炸傷」面：「嗰日游咗個幾鐘水，突然覺得嘴好痛。其實我初時係見唔到隻水母，可能游自由式，撥水時將隻水母撥咗埋身都唔知，後尾先見到，都好大隻，仲有幾隻喺附近。唔好彩之中算好彩，因為我有着潛水衣，所以手臂同身包住嘅地方都冇事，但面同頸就炸親。」問到鄭生為何不英雄救美？她說：「我喺水痛到叫救命，佢其實游喺我附近，仲以為有鯊魚，不過佢都慘，冇着潛水衣，炸傷咗成隻手臂，依家都係搽敏感藥膏同食抗生素。」雖然口說擔心水母螫傷傷痕留疤，但前日她又繼續落水，似乎未驚過。