孫慧雪晒肚影仙氣寫真

34歲宅男女神孫慧雪去年12月跟圈外男友羅天彥（Edwin）拉埋天窗，火速傳出喜訊，雪雪轉眼已懷孕六個多月，巨肚比籃球更大，預產期是今年8月底。去年曾推出索爆寫真的她，趁大肚留倩影，由美女設計師Lilian Kan（簡幗儀）操刀拍攝一輯充滿夢幻氣氛的大肚寫真！雪雪今次造型充滿仙氣，由一片花海襯托，以粉紅及白色做主色，唯美之餘帶點少女風，而她不時摸着巨肚，母愛氾濫！

大住肚唔識擺Pose

雪雪受訪時表示，服裝及場地都由Lilian準備，感激對方妥善安排：「我未試過大住肚擺Pose，開頭唔知點擺，睇番覺得自己好肥嘟嘟，不過好開心、好得意，Lilian啲嘢好夢幻，真係好多謝佢！做咗媽咪之後人成熟咗，更難有機會影啲咁少女嘅相喇！（老公有冇一齊影？）佢唔肯影呀！之前影婚照曝晒光，佢怕醜，所以由Lilian代爸爸位置影咗張相。（有啲造型都幾性感，老公有冇詐型？）影大肚相梗係要露肚，好正常，佢唔會鬧。」雪雪指當日有不少好姊妹包括劉佩玥到場幫手打點，實在受寵若驚。

孫慧雪影大肚寫真，摸着巨肚的她流露出母愛。	孫慧雪做足所有準備，8月生得。	簡幗儀（左二）操刀為雪雪（中）影寫真，劉佩玥（右）前來打氣。

上分娩球班助產

踏入懷孕廿六周，雪雪自覺幸運未算太辛苦，只是有點腰痛：「BB係大Size，依家我好畀心機去睇資料，同埋做吓孕婦瑜伽，等真正生嘅時候冇咁緊張，我仲諗緊上唔上分娩球班，啲人話生嘅時候度數會易開啲，易生啲，因為係大BB，所以我要做足準備。」

文：影視組