黃智雯爆姚子羚聲東擊西掩飾婚期

黃智雯與王敏奕昨日出席邵氏網劇《飛虎極戰》開鏡活動,曾演女飛虎的黃智雯今次在戲中不用拍動作戲。提到近日已婚的傳聞,她連忙否認:「未有咁快,依家仲係一對好穩定嘅情侶。(姚子羚話你工作去到八月,有期結婚?)我自己都唔知工作安排到幾時,可能係佢聲東擊西呢,哈哈,不過大家都希望向住呢個方向。(心急?)急唔嚟。(唔婚就分?)我哋感情好穩定,需要啲時間去傾。」提到好姊妹胡杏兒有喜,身為細契媽的黃智雯說:「好戥佢開心,佢一直想有小朋友,計劃之內。(恨生B?)恨唔嚟,當杏兒個B係我哋嘅小朋友,大家輪住錫。」

而身為劇中唯一女飛虎的王敏奕笑說:「預咗要打,暫時收到頭五集,已經打低咗Bosco!仲學緊拎槍,之前未試過。」要頻頻操肌的她,問到可擔心大隻過男友曾國祥?她笑說:「好難大隻過佢,fit過佢就得!」王敏奕在劇中與黃宗澤有感情戲,提到對方緋聞多多,她笑說:「我OKo架,係緋聞絕緣體!(男友放心畀你拍劇?)佢對我好有信心!」