苗僑偉交波叫張兆輝晒肌
演員苗僑偉及張兆輝昨日以飛虎造型，為網劇《飛虎極戰》拜神。兩位型佬弗爆現身，chok贏同場的後輩黃宗澤與吳卓羲。由於新劇投資巨大，張兆輝爆料指苗僑偉酬勞應該加唔少。
邵氏與優酷合拍的網劇《飛虎極戰》演員苗僑偉（三哥）、黃宗澤、吳卓羲、張兆輝、王敏德、吳岱融與王敏奕等，昨日以飛虎全副武裝造型在將軍澳為網劇拜神，其他演員包括伍詠薇、陳凱琳、黃智雯、高海寧、梁烈唯等。
等足30年終合作
三哥與張兆輝兩位型佬，全套裝備戴着墨鏡chok爆現身，更互笠高帽。三哥大讚張兆輝是「影帝級」，對方則回敬笑指他是「宇宙最型」。兩人私下老友鬼鬼，但《飛》卻是首度正式合作的劇集，三哥說：「大家成日私下食飯，喺化妝間就成日見，講到拍劇佢都等咗我30年！」
劇中兩人要全套武裝上陣，三哥爆料指張兆輝已練成六舊腹肌，八舊腹肌更指日可待，他自己因早年肩傷舊患，晒肌重任就交給張兆輝、黃宗澤及吳卓羲等人。問到夏天拍劇會否辛苦？張兆輝說：「應該有好多室內拍，有冷氣，加上我哋咁多人，輪流拍可以抖吓。今次有好多資源，可以拍得仔細啲。（酬勞加咗好多？）三哥應該加唔少！」
黃宗澤恭賀舊愛
至於黃宗澤與吳卓羲亦是繼劇集《英雄‧刀‧少年》事隔十多年後再合作，問到他們是否已操出腹肌及人魚線？吳卓羲笑說：「依家仲努力緊，鯨魚線就有。」黃宗澤說：「咁我有金魚線，估計最fit係王敏奕。」提到「舊愛」胡杏兒有喜，黃宗澤說：「恭喜佢，戥佢非常開心，希望BB快高長大，如果想生就快啲三年抱兩喇。（幾時到你迎頭趕上？）迎頭趕上？我都係尋日先收工，個人都仲未抽離，真係冇時間。（短訊恭喜杏兒？）仲未，真係要認衰。」
文：影視組