Talk騷隨時踩界 Ben Sir出招隔離細路
Ben Sir（歐陽偉豪）將於6月底舉行一連兩場Talk騷，他日前接受專訪時笑言緊張程度與日遞增，雖鐵定不會再加場，但不排除開Part 2的可能。談到今次話題大有可能「踩界」、嚴禁12歲以下觀眾入場，他坦承很難監察是否所有入場人士都守規：「今次個騷嘅布置係好似大家喺班房咁，我會同台下嘅觀眾互動同討論，有需要嘅話咪喺隔籬增設圖書室或者育嬰區，家長有需要就帶小朋友過去！我哋係需要好好保護小朋友嘅，但我覺得即使好似空氣有細菌咁，都未必會傳染所有人。」
自認嘴賤 玩埋老婆
人前談笑風生的Ben Sir表示與太太很少吵架，即使到商場搵洗手間，兩人都大玩「正字」﹕「我會問老婆究竟係『急尿』定係『尿急』囉！」又自爆體內的「賤精」源自中學時期：「我哋玩得埋嘅同學都嘴賤，成日被罰企！」
原來私底下的Ben Sir亦有正經一面，曾為學業前途感焦慮：「我老竇當年問我如果重讀，係咪有信心考到（大學），咁我真係冇！咪跑去讀師範囉！我仲考到體育老師嘅資格，我係教體育出身嘅。」問到會否全身投入娛樂圈，Ben Sir故弄玄虛：「咁要睇吓日後香港市民需要我啲乜。」
文：影視組