孫耀威認定陳美詩 生死可相隨

Eric跟Macy拍拖多年，但一直沒有結婚計劃，早前二人突然在美國秘密註冊，Eric自爆因婚前與Macy在上海有段難以忘懷的生死經歷！昨日他透露有一次被騙到上海工作，遭做酒商生意的人恐嚇勒索數百萬，對方更找來幾名手持木棍的大漢招呼他，他形容是綁票、勒索行為，因為擔心不付錢會被人挾走，當時他每日都自備打開的軍刀傍身，篤到褲也穿窿，更令他差點患上抑鬱，期間Macy對他一直不離不棄。

打官司 最後勝利

Eric說：「呢件事內情好複雜，牽涉到我哋兩間公司合作嘅嘢，因為交過畀法庭處理，所以細節唔方便透露。因為呢件事，學習到內地一啲法律，因唔想嘥錢打官司，由Macy幫我像律師草擬類似上訴狀之類，我哋膽粗粗去告佢哋同上訴。」雖然開始時曾輸過，幸最終獲勝，討回公道。他說：「過程好複雜，重點唔係攞番錢同酒嗰度，件事已經過去咗，開心嘅係過程，我同Macy係相依為命，膽粗粗同世界打仗，得着係我哋兩個人嘅默契。」

他不想再記住這段生死經歷，每次到上海過關時Eric必定祈禱，但為了工作及生意，不能避免再到上海：「我唔會驚去上海，但每次去都想Macy陪住，好似有個人好清楚我心裏面擔心啲乜、諗緊乜，好清楚我發生過所有嘢，佢喺我身邊，我會有好大嘅安全感！」又說很喜歡上海，會用積極態度面對。

心急搵教堂行禮

至於籌備婚禮的情況，Eric坦言婚宴無法短期內舉行：「未急切住，反而想快啲搵到教堂做行禮儀式，因為仲未交換戒指。」之前他到美國註冊時，因太緊張忘記帶結婚戒指，笑言要補做：「做番呢樣嘢，要交功課！」

文：音樂組