周志文過足波癮 攻入八分

熱愛籃球的周志文（大孖）獲十多名Fans到場助威，最終攻入八分，包括兩球三分波，投射及傳射都功架十足！大孖受訪時直言練開外圍投射，射三分波當然冇難度：「開心自己入到波，又幫到隊友，同鄧穎芝、方詠琳打開波，有晒默契。今日亦好開心可以同專業球員同場，過晒波癮！」對於林盛斌得零分，大孖幫他講好說話：「佢外形太亮眼，大家都防守佢，佢已經好落力，又飛撲救波。」現場見大孖健碩不少，他表示要為下個角色苦練爆肌，最近連續六日做Gym：「依家已經有42吋胸肌，但想再大啲，有幾多做幾多。」