細細粒出戰籃球賽橫衝直撞 鄧穎芝咖喱仔上身冧莊MVP

歌手鄧穎芝（Vangie）、「籃球界女神」方詠琳、藝人陳嘉佳（細細粒）、周志文、蕊蕊、《東張西望》主持李旻芳、黃耀英、林作、林盛斌（Bob）與旗下新人蔡宛珊等，出席「Panasonic學界籃球邀請賽2017」，藝人范振鋒則任球賽司儀。眾人分成「警察大使」及「籃總名人」兩隊作賽，球隊未開始已充斥火藥味！不懂球規的細細粒揚言落到場會橫衝直撞，搞到敵對的Vangie、方詠琳、蕊蕊與李旻芳率先聯手對她箍頸、攬腰，Bob見狀即加入戰團為細細粒解圍，場面搞笑。

外圍投射3分愈打愈順

球賽一開始，Bob夥拍「航空母艦」細細粒對抗球技超班的Vangie及方詠琳，細細粒一落場即撞到敵方球員瞓地被吹犯規，最後更被教練收起做「秘密武器」。一直被細細粒「盯實」的Vangie見狀，在好友方詠琳助攻下多次剷籃得分。Bob搶波期間慘遭蕊蕊及李旻芳聯手「撩陰」，剛再做老竇的他幸保得住「子孫根」。由於細細粒所屬的球隊一直落後，教練見勢色不對再派她落場，成功嚇怕「得分王」Vangie，同時逼使她改變策略要靠外圍3分投射，但Vangie與方詠琳愈打愈順，聯手合共射出五個3分波，帶領球隊以48比43反勝。

「籃球界女神」方詠琳投射、剷籃冇難度。	以撞人犯規為戰術的細細粒，慘被同事笑似企鵝。	細細粒一落場即把敵方男球員撞跌，相當具威力！

被笑似企鵝波都未掂過

去年得16分的Vangie，今年再取15分，表現直情好似NBA「三分王」史堤芬居里（Stephen Curry）。被封「女版咖喱仔」的她對於再奪MVP，謙虛表示：「好開心，好好玩。」並大方透露蜜運中：「有個發展中圈外男友。（公開？）穩定啲先啦，佢同我一樣好鍾意做運動。」平時與Vangie一齊打籃球的方詠琳，大讚對方勇敢：「我打波好錫身，佢就唔同，好有Power剷籃。」

而細細粒承認好有挫敗感，她說：「幾乎冇掂過波，仲畀公司同事笑我似企鵝，今次我係用犯規戰術，好狼死咁推開班敵對球員。（波都未摸過？）係喎，個個都超音速避開，搞到我不停咁追。」對於隊友Bob指她「阻住晒」，細細粒即反擊說：「唔覺佢有幾勁喎。」

鄧穎芝毫不錫身，面對比自己高大的男球員亦絕不怯場。	有「航空母艦」之稱的細細粒，被敵對球員聯手箍頸、攬腰，場面搞笑。	史堤芬居里

文：音樂組

攝：鄭家俊、林蔚恩