吳若希心痛囡囡嘔奶 自責爆喊

「世上只有媽媽好」，今日是一年一度的母親節，圈中一班新手媽媽對於由女兒榮升人母過節感受深刻，其中現年24歲已做媽咪的歌手吳若希（Jinny）上月誕下囡囡Giselle，她昨日接受本報訪問，憶起當時見到BB出世十分感動：「無論之前佗B幾辛苦、嘔得幾厲害、生嗰陣嘅十級痛楚，直至見到佢平安出世，嗰種感動真係蓋過晒所有唔舒服！」她又記起以前媽媽湊大她的經歷：「嗰時佢一個人湊大我，但我細個仲要唔生性，原來嗰時媽咪係好辛苦同好錫我，所以今年母親節感受特別深。」

楊采妮孖寶健康心足

講到湊B辛酸史，她坦言最深刻是BB首次在醫院床上嘔奶：「嗰陣我聽到有聲但冇為意，以為佢喺度玩，點知原來佢喺度嘔奶，我即刻緊張到喊，覺得係自己疏忽，好心痛，跟住姑娘、醫生走入嚟同我講BB嘔奶好正常。」講到她自言以前不生性，問到可怕囡囡步她後塵？她說：「做咗人媽咪先知就算個女幾曳、幾激心，媽咪都係會原諒佢，好似我個女半夜扭計，但望住佢都係會唔捨得、會抱佢，所以如果第時個女好似我細個咁激我，我會同自己講你細個都係咁，做得媽咪就要受，所以我會好錫好錫好錫好錫好錫我個女，希望可以縱壞佢。」單親家庭長大的她亦希望與另一半和諧相處，令小朋友有健全家庭。

講到湊B最辛苦的，當然是3月誕下孖仔Ignatius及Aloysius的楊采妮，她表示近來忙着照顧小孖寶，故沒意識到母親節，但老公覺得今年是她首次以「母親」身份過節，故全家會出外吃飯慶祝，她亦謂見到孩子健康成長已是母親節最好的禮物。講到湊B情況，她說：「睡眠時間確實不足，但因為我有乖乖坐月，所以醫生說我恢復得很理想，身體狀況也不錯！」她亦跟隨醫生建議，盡量餵母乳增強孖仔的抵抗力：「看到他們愈來愈壯健，雙頰肥嘟嘟、紅卜卜的，我們也比較放心了。」

Miki無條件奉獻

至於3月尾誕下囝囝Luken的前Cookies成員楊愛瑾（Miki），現時當了個多月媽咪，提到成為了母親，她說：「最大感想係無論我幾攰、幾想出街、幾想做自己嘢都好，但我知我身邊有一個人好需要我，覺得我要先照顧咗佢先。見到BB喺我身邊每日長大、每日有唔同表情，佢望住我乜都唔做，就咁挨喺我度已經覺得好幸福！」她透露母親節會與爹哋媽咪、老爺奶奶兩家人一起食飯：「我會請媽咪同奶奶食飯，老公就代我個BB請我食。」

同樣首年以媽咪身份過節的女星李蘊，特地與快將一歲的囡囡羅紫晞影了一輯溫馨母女照，她說：「上年（母親節）個女未出世，所以今年對我特別有意義。我媽咪嚟咗廣州，星期日可以一齊慶祝。」去年7月誕下囡囡的歌手關心妍上載兩母女的溫馨相片，並留言：「你笑到月亮眼，我心就有彩虹。」而4月中誕下兒子的葉翠翠前晚上載一家三口及抱B照，其後又上載手臂紅腫的相片，表示是愛的印記：「全程要抱住10磅幾的小王子真係唔講得笑。」

文：音樂組