荷里活男神畢彼特（Brad Pitt）最近面容憔悴出現在雜誌《GQ Style》封面，破天荒首度開腔談及與影星太太安祖蓮娜祖莉（Angelina Jolie）去年離婚一事，除提及酗酒等問題外，更認低威爆粗自封「X街仔阿畢」！畢佬又自爆失婚後曾避走好友家「打地鋪」，瞓足半個月！
現年53歲的畢彼特首度在雜誌訪問中表示，以往花太多時間在拍戲上，加上酗酒問題因而忽略家庭。他又指自己於情感上好遲鈍，對於仔女冇好好表達感情，「離婚」一事令他醒覺要為仔女做得更多：「小朋友會吸收所有東西，我們需要緊握他們的手，教導他們一切事物。」當記者問到畢佬會否認為自己事業有成時，他竟爆粗表示希望改名：「好似P.Diddy咁改名，我只係覺得畢（Brad）呢個名係誤稱，我家陣覺得自己應該叫『X街阿畢』。」看來離婚確實對他打擊甚大。歷盡滄桑的畢佬更坦言已唔再當自己是演員，演戲在其人生百分比上已佔非常小部分。
對於酗酒問題致婚姻破裂，畢佬自爆大學畢業以來每日都飲酒或者食大麻，但離婚後，已開始接受治療戒酒癮及毒癮，依家每逢想飲酒，就會飲紅莓汁加有氣礦泉水來「頂癮」。被問到戒大麻是否困難時，他表示並不困難，更回想起自己食大麻的日子，表示之前一直想與歌手Snoop Dogg及Willie Nelson一齊食大麻，但至今仍未與Willie「分享」。此外，畢佬亦有提及婚變後的頹爆生活，由於當時不想返回比華利山大宅住，故去了導演好友大衞芬查（David Fincher）位於聖莫尼卡的家中「打地鋪」，瞓足半個月！
而新一期的《US Weekly》雜誌，就揭露畢佬去年9月在機上「醉酒打仔」一事的細節。報道指畢佬當時在機上飲到好醉，當飛機降落停低加油時，安祖蓮娜叫他去清醒一下。現場人士聽到二人有爭吵，畢佬一怒之下，走到停機坪駕駛燃油車橫衝直撞，期間更差點撞向另一架車，情況相當危險。
文：外娛組