陳蕾窮到賣結他眷戀Sing夢

當年只有19歲的陳蕾（豹哥），膽粗粗一個女仔由廣州來港參加第一屆《亞洲星光大道》，人生路不熟，有的只是對音樂的熱誠：「當時咩都冇諗，想挑戰吓自己。」最後屈居冠軍羅力威而奪得第四名，並順利簽約電視台成為合約藝員，直到2014年卻毅然離開安穩的圈子，她坦言心理突然面對不少壓力：「有一期要箍牙，個人好冇自信，唔想露面見人！覺得自己上鏡又唔靚，所以就匿喺屋企做吓手工，整吓手機殼維持生計。」

解約陷迷失期

翌年，失落的豹哥有唱片公司招手，迎來事業上的曙光：「佢哋畀底薪我，一切又好似再安定落嚟，但嗰段時期雖然冇經濟壓力，不過好似唔係自己想做嘅音樂，最後都係解約。」再次抽手但沒有迎來生機，反而令她進入迷失期：「斷斷續續都有大公司嘅合約喺身，去到上年開始有問題，因為買我電話殼嘅人要買都買咗，經濟開始出問題，為咗生計甚至要賣結他，但幾難捱都已經捱過。」

陳蕾想當年與羅力威鬥唱，可惜同台唔同命。	陳蕾一改Rock味，以清新形象拍廣告。	陳蕾坦言最窮時要變賣結他，幸好已捱過人生低潮。

講出嚟冇人明

除了經濟壓力，家人與朋友由當初支持的聲音，慢慢變為質疑，豹哥說：「當年18、19歲嚟香港搵夢想，但去到今年已經26歲，感受到父母開始擔心，特別係食緊積蓄嘅狀態。唔係咁多人明白點解我要放棄有底薪嘅大型經理人公司，去做獨立音樂呢條路，講出嚟冇咩人明，講到工作我會覺得好孤獨同無助！」幸運地豹哥遇上一班志同道合的朋友，並合作計劃今年推出新唱片，她說：「第一站我哋去咗台灣，搵嚟知名音樂人合作，錄咗好多首國語歌，都會想唱廣東歌！今年內會出新專輯，希望我嘅音樂可以感動更多嘅人。」

文：盧嘉靜

攝：秦健輝