廖子妤影壇馬拉松 終點做導演

廖子妤（Fish）早前雖失落《第36屆香港電影金像獎》的最佳女配角，但她並沒有氣餒，覺得這次能夠入圍已是越級挑戰：「由細到大，金像獎對我嚟講都係好期待，今次能夠越級挑戰，已經覺得賺咗。」Fish以馬拉松來比喻人生，因以前膝頭好易腫，令行路姿勢不正確，最後發現要慢行及跑步來糾正，從中學懂慢慢欣賞這個世界，最重要是堅持：「馬拉松最後階段係好攰、好辛苦，可能我依家嘅影視旅途已經跑唔落去，就會容易想放棄。」

Fish於17歲入行，十年後才發現最愛是做戲，喜歡去「創造」：「我拍電影已經五、六年，鍾意建立角色，覺得好玩！由零到一個製成品出嚟，畀一個夢觀眾，所以我都想做導演拍吓黑色幽默電影。我試過寫劇本，彭浩翔有畀意見，鼓勵我寫出嚟。」入行十年的她直到最近才嶄露頭角，問到有否想放棄？Fish說：「如果做Freelance嘅話，媽咪就好擔心囉！媽咪覺得要按時有薪水、30歲前就結婚安定過一生，我諗到就覺得好驚，覺得太安穩。」她自爆因工作試過喊，情緒起伏大又易受人影響，最後要找人傾訴才走出來。

拿人手短 吃人嘴軟

娛樂圈有不少人選擇走捷徑，但Fish選擇一步一步走出屬於自己的賽道，謝絕飯局：「你係咩人就吸引到咩嘅朋友，你想實際啲要錢嘅話係冇錯，而我散發嘅氣場係唔需要人哋提供啲咩畀我。（飯局？）有好多人私訊我，話食飯就會有幾多錢，有一百萬、二百幾萬已經可以拍到電影，拿人手短，吃人嘴軟，我自己覺得拎人嘢冇付出，係矮人一截，我唔想咁樣，我想有Say！」

文：名人組

服裝：Adidas

化妝：Melody Chiu @ melodychiumakeup