鄧月平水着Fit爆力證冇餡
早前被揭撻着31歲前拳王杜恒霖的36F鄧月平（Larine），日前被讀者爆料指她懷有男方骨肉。否認佗B的Larine其後晒出fit爆泳裝照力證清白，又自認女強人而未有生育計劃。專注事業的她透露曾壓力爆煲：「試過收工就狂食二十粒燒賣同幾個粉果，邊喊邊食！」
19歲坐擁36F上圍的藝人鄧月平（Larine），繼早前被本報獨家披露撻着31歲前拳王杜恒霖後，日前又有讀者爆料，指她懷有杜恒霖的BB。Larine接受本報訪問時否認有喜，直言感到莫名奇妙，更發出一張泳裝照力證沒身孕：「冇BB，我知道有人傳我有BB，仲有人話我細佬係我個仔，我都好想知道邊個咁講我。以我所知係佢（杜恒霖）朋友嘅太太有咗BB，依家變咗話我咁搞笑！」問到被傳有孕會否生氣？她自認是女強人，未有生育計劃：「畀人傳冇咩嘢嘅，外人又唔知內情。我覺得自己係女強人，有小朋友都唔會係呢個年紀。」
喊住狂食燒賣
Larine透露近日忙於增值自己，爭取試鏡機會：「夏天到喇，我就嚟有番22吋腰。我呢排為咗Casting而狂做運動，分別學習鋼管舞、空中絲帶舞、水袖舞及花式溜冰，因為機會只會留畀有準備嘅人。」她又自認工作狂，曾為練習演技而逼自己情緒大起大落，更自爆試過壓力爆煲而邊喊邊狂食燒賣：「我一靜就會精神緊張，要搵嘢做，試過有次收工壓力爆煲，狂食二十粒燒賣同幾個粉果，邊喊邊食！但依家已成過去，冇事喇！其實好多新人都好努力，唔止我一個！」
另外，Larine有份參演的電影《棟篤特工》日前煞科，以低胸裙甜美亮相的她，在片中化身少女組合隊長，與蘇麗珊大鬥法。
文：影視組