狄龍化身唐三藏哦爆譚俊彥

狄龍的獨生子譚俊彥（Shaun）於2015年榮升爸爸，囡囡現已一歲半，日前被本報直擊他帶太太及囡囡相約父母狄龍及陶敏明飲茶，發現Shaun太太腹大便便，目測懷孕約五個月，而且肚尖疑似佗仔。雖然狄龍將再度做爺爺，但緊張大師上身的他，不斷哦Shaun要好好照顧太太，對方低頭密密聽，又搭爸爸膊頭示意叫他放心，見狄龍不時冧笑，顯然對再度抱孫表現興奮。

對孫女冇大細超

雖然狄龍將再抱孫，但他沒厚此薄彼，仍舊疼錫孫女，食飯時孫女扭計即帶對方行街，撞到影迷時又大方談湊孫經。一家人飲茶後轉戰玩具店，狄龍全程抱實孫女，又讓對方任揀玩具。而陶敏明則與囝囝及新抱睇BB衫，見Shaun手執連身衫仔，與太太左揀右揀，最後揀幾件B仔款的連身衫後埋單走人。

譚俊彥太太已懷孕五個月，一同為Ｂ仔買衫作好準備。	狄龍對孫女同樣疼錫，與囝囝譚俊彥三代同堂揀玩具。	狄龍歎茶時不忘叮囑譚俊彥要照顧好太太。

為對鞋鬧足半粒鐘

記者事後致電Shaun，他親證太太再度懷孕佗仔，三年抱兩湊夠「好」字。他說：「其實今次係意外。（狄龍好開心？）梗係開心啦，話就話仔女都冇所謂，但佢哋一早去還神。」他又透露太太預產期在九月，但未能停工陪對方坐月。至於被爸爸哦爆，他說：「佢成日哦我o架啦！早幾日我拍《天命》着古裝襯對似波鞋嘅鞋，佢打嚟鬧咗我半個鐘話我唔專業。其實係個款似波鞋啫。」他又指狄龍現時弄孫為樂，只要他開工狄龍就負責湊孫女，相信爸爸將來湊兩個孫都應付得到。

文：影視組