劉佩玥經高手調教 做排球女將
無綫藝員劉佩玥、劉穎鏇、馮盈盈等昨午出席排球賽宣傳活動。劉佩玥父親原來是排球高手，經他特訓後令缺乏運動細胞的佩玥能夠順利加入校隊：「所以今日同場見到孫玥好開心，大家都有個『玥』字，對佢有情意結。（展開過排球情緣？）當時男男女女一齊練波，大家感情好好，冇諗咁多嘢。不過我第一個男友都係運動健將，佢玩三項鐵人、排球、籃球等，嗰段日子係好難忘嘅青葱歲月。（鍾意運動型多啲，好似打功夫咁？）運動同功夫都唔關事，係覺得運動比較正面，陽光啲。」
而劉穎鏇最近獲派主持《學是學非》及《安樂窩》等節目，當被讚廣東話有進步時，她開心不已。談到《學是學非》一眾師姐很嘈吵，她笑說：「效果嚟啫，我哋真係拍得好開心，佢哋好肯教我嘢。」身形高大的她即場大晒球技：「我都打咗兩、三年排球，見到孫玥好興奮，第一次見真人。（同男友一齊打？）佢打美式足球，比較危險，好彩未受過傷。」
