林作寧斬豬肉罷做男神
林作放棄大律師執業資格後瓣數多多，除了躋身大銀幕拍戲外，亦榮升「補習天王」，他卻自言對演藝事業「絕對絕望」：「冇乜演技，個人又唔好笑，樣又不敢恭維，其實我喺呢行真係冇乜發展空間。」話雖如此，事實上卻有不少人邀請拍戲，他坦言最緊要不用扮靚仔男神：「唔好逼我做啲太過搞唔掂嘅嘢，豬肉檔嗰啲斬叉燒我OK，酒吧侍應都OK，扮男神就唔好搞我，唔好呃觀眾！之前有個台灣報道話我係萬人迷律師，到依家都笑到傻咗，太完美嘅角色做唔嚟，反而醜角就得，比較符合真實生活中嘅我。」
他自言對演藝事業絕望，對於5月開始的「補習天王」一職則充滿信心及野心，他說：「承認自己英文好過中文，但我中文都尚可，覺得可以畀到學生建議，同啲佢哋之前未必接受過嘅教學風格，呢方面好有信心，亦都好有野心。我係教啲諗住去外國留學嘅學生，長遠嚟講覺得呢個學生群會更大，我希望可以做到大中華區，教到更多人，對我嚟講係冇白讀到書！」
賺多啲儲老婆本
提到曾表示棄做大律師是想賺更多錢，他坦言現時轉做幕前及「補習天王」收入比以前多：「按照預期嚟講，近呢一年會多。（多幾多？）暫時未有總結。（希望一年賺幾多？）冇上限，愈多愈好。」他希望賺更多錢做到真正財政獨立，不用靠家人就娶到老婆，亦希望搵夠錢後為社會服務。娶老婆除了要有老婆本，最重要當然要有老婆，問到現時的感情狀況？他只說：「一片……（有冇女朋友？）依家完全冇女仔會接近我，避忌嘅情況多，覺得好可悲。（你冇女仔圍，同你糾纏不清嘅麥明詩咪好放心？）冇回應。（感情一片光明定空白？）我講『一片』啫，冇話光明定空白，個Gap留畀觀眾自己填。」此外，他之前接受面包台《變麗店》訪問，節目中大談美麗人生。
文：音樂組
攝：劉斌
場地：面包台