丁子高包場睇老婆出軌
藝人楊千嬅前晚為主演電影四出謝票，老公丁子高出錢又出力，包場請一眾好友睇戲。對於戲中千嬅與余文樂有親熱戲，丁子高笑言睇住老婆出軌如睇鬼片，要搵手遮眼！
千嬅及余文樂主演的電影《春嬌救志明》前晚開畫，千嬅與導演彭浩翔、邵音音及陳逸寧等兵分四路到多間戲院謝票。老公丁子高則包場請好友睇戲，包括王馨平、陳法蓉、琦琦、歐陽妙芝、星級排舞師Sunny Wong及太太、名媛翁嘉穗與蔡一鳳等。
對於戲中有千嬅着護士裝色誘樂仔兼親熱的場面，丁子高笑言似睇鬼片：「千嬅拍呢齣戲好辛苦，夫婦要互相支持，佢都好支持我！不過今次好怪，已經睇第二次，因為佢演得太好，我好似睇住老婆出軌，直頭全晚睇鬼片咁，用手遮住對眼，手指罅睇。（你妒忌？）哈哈！」
跑九間影院謝票
千嬅表示昨日跑足九間影院謝票，最開心是出場前偷聽觀眾的反應，對於樂仔因拍戲未能現身，千嬅笑言要屈對方請食飯：「上集我大肚去唔到宣傳，佢話幫我頂得好辛苦，今次我諗一個禮拜都還凸畀佢，佢一定要攞佢嗰份出嚟請食飯啦！」謝票活動上，觀眾見到千嬅現身都非常驚喜，千嬅不但大放笑彈，更送上電影原聲大碟給幸運粉絲。
恨組隊拎新人獎
她指大碟只用了四個星期時間籌備，多謝黃偉文為她填了一首歌詞，而她亦與拍檔陳逸寧、林兆霞組隊MKB48翻唱了一曲《傳說》，笑言要再報名叱咤新力軍組合：「唔知可唔可以再做新人，我哋三個加埋過百歲，新人但係人瑞嘅年齡。（真係會角逐？）如果真係得嘅話，我一定去，畀個仔知我幾犀利。」此外，《春》片首日開畫票房收逾180萬港元，是2017年非紅日開畫日最高票房港產片，成績不俗。
此外，余文樂日前接受內地媒體訪問，他表示不希望未來太太於婚後工作，開支由他負責。他稱除非對方很想工作，自己亦會尊重太太。
文：影視組