魏駿傑屢傳婚變咀老婆放閃

魏駿傑與年輕廿載的太太張利華近年屢傳婚變，男方雖多次否認，但傳聞仍然沒完沒了。昨日魏駿傑與友人合資的餐廳開張，即夫妻檔亮相，心情大靚的張利華笑到四萬咁口，合照後又應傳媒要求上演咀嘴甜蜜Kiss，張利華一副冧樣，場面溫馨！擺明以行動證明夫婦依舊恩愛。

餐廳股東冇太太

魏駿傑曾透露西貢的現居已有太太名，問到餐廳股東是否也有太太？他說：「唔使啦，啲樓寫咗太太名，餐廳又寫？今次係我同幾個朋友分別夾7位數字投資，泰國餐廳，近海邊，環境好靚，所以打算搞埋婚禮場地，等一對新人可以坐船嚟到碼頭就上岸，都食番『上到岸』嘅意思！（圈中人幫襯有冇折頭？）有，可惜郭富城結咗婚，唔係就可以嚟呢度搞。」早前曾放風想拍劇的他，坦言即將會有回音：「我諗住請（無綫高層）曾勵珍小姐嚟呢度食飯，佢好錫我，氹吓就得。」

魏駿傑話西貢間屋有老婆名，今次開餐廳冇張利華份。	張沛樂想男友儲多啲老婆本先結婚。	李曼筠悉心打扮來撐場。

張沛樂等嫁

而女模「沙律」張沛樂則表示有興趣投資做生意，但現階段先專注工作，待儲備充足銀彈才作打算，問會否預男友林耀聲份？她說：「唔會，唔係怕因財失義，係想各自做好工作先！（同男友有冇共識幾時結婚？）睇吓佢囉，畀多啲機會佢！（你意思係等佢求婚？）等佢搵多啲錢，事業有成先，咁大家都視對方係結婚對象嘅。」

至於仍單身的阮小儀，被問到會否為自己的婚禮做資料搜集？她說：「唔會，到咗呢個年紀想簡單啲，屋企人近年都冇催婚！」

文：影視組