任達華嘆痛失人才

任達華

我都係啱啱今朝先知，個心好唔舒服，因為佩華姐由以前到依家都係香港嘅大製片家，為香港電影做咗好多貢獻，今次走咗，大家都覺得係損失咗個好好嘅人才！

鄭丹瑞

她的名字叫陳佩華，我人生第一次執導演筒，拍《吳三桂與陳圓圓》，全賴她的鼓勵，做我監製，介紹投資者，無言感激……我不會令妳失望， 我會繼續拍好我的電影。

馬國明

好突然，一年前見過對方，佩華姐好好o架！記得當時我訓練班啱啱出嚟嗰陣，佩華姐已經畀好多鼓勵我哋啲後輩，當今日我知道呢個消息覺得好突然同好可惜，一個咁提攜、咁錫後輩嘅前輩咁就離開咗，有啲傷感。

胡楓

吓？今日打畀佢唔怪得冇人聽，諗住問候佢，哎呀！佢係非常非常非常好嘅電影製片同電影人，同佢識咗十幾年，佢曾經幫洪金寶製片監製，喺無綫時都一直有聯絡，亦曾經合作。

黃宗澤

吓？咁突然！我真係唔知！我哋有聯絡，但唔多。我哋都好耐冇見，平時有短訊問候，不過佢冇講到自己有病，真係好愕然！以前喺無綫時，佩華姐都經常提點我，佢同我媽咪感情都好，可能老人家啱傾啲，平時佢哋有講電話。

徐小明

好可惜，我同佢喺嘉禾時期已經開始合作，佢個人好熱心，又對電影非常熱衷，幫過唔少藝人同導演，係何冠昌嘅得力助手。當年佢離開香港去澳洲發展餐飲業，之後我就去英皇電影做CEO，到我離開時安頓晒所有嘢後，都請佩華返香港幫楊生（楊受成）。本來想今朝去探佢，點知就喺群組睇到佢走咗嘅消息。