文青女神變負皮女神 蘇麗珊雙重打擊匿埋唔見人
藝人蘇麗珊兩年前誤打誤撞而入行，甫出道已交出亮眼的成績表，多次獲得獎項提名，更被封「文青女神」。不過，女神光環的背後，其實要面對不少壓力，令她一度吃不消，更試過「匿埋喺屋企唔見人」逃避一切。
2015年，擁有一頭清爽短髮及陽光笑容的蘇麗珊（Cecilia）殺入大銀幕，甫出道已令觀眾留下深刻印象，更憑健康形象被捧為女神，大受歡迎！不過，大學主修環保的Cecilia坦言從未想過入行，原本打算畢業後投身環保行業，只因一次機緣巧合下才踏足娛樂圈：「當時見到黃修平導演喺網上為新戲搵演員，所以膽粗粗去試鏡，點知誤打誤撞成功咗。原本諗住試吓演戲係點，冇諗過會愈演愈鍾意，同埋發現到演出唔同嘅角色就好似嘗試過其他嘅人生，所以選擇繼續演戲。」
處女作為Cecilia贏得關注，更帶來台灣金馬獎及香港電影金像獎的提名，惟她回憶第一次演戲，對於冇演戲底子的她，絕對是大挑戰！她說：「當時對住份劇本係完全唔知點落手，個角色同自己嘅性格反差好大，情緒反覆同複雜，好驚演得唔好，日日夜夜都諗住要做好啲，反而更大壓力。好彩導演有耐性教我、又開導我，之後慢慢放鬆先進入到個角色，所以覺得自己好幸運，一入行已經有咁多人幫我，真係好多謝佢哋。」
「林嘉欣先係女神」
初登銀幕的Cecilia嶄露頭角，廣告代言及電影工作接踵而來，演藝路上看似一帆風順，背後卻歷經荊棘。回顧過去一年，她坦言被負面新聞纏身，又要面對批評聲音，雙重打擊令她吃不消：「同好Friend嘅男性朋友出街，喺我嘅角度只係好普通同朋友見個面，但原來會容易令人誤會。當時有關新聞出咗街，個反應我係預料唔到，當然覺得好無奈，同時亦對朋友好抱歉。」
期間，Cecilia的情緒陷入低谷，試過「匿埋喺屋企唔見人」，幸而性格樂觀的她之後亦想得開：「依家學識搵個平衡點，可能約多啲朋友出街，唔會咁易有誤會，一班人玩仲開心！同埋做藝人實有人鍾意你，亦會有人唔鍾意你，最緊要做好自己，調整好心態，依家喺網上睇到有關自己嘅評論，如果係批評我有咩不足，我會反思可以點樣改善。」負面新聞令Cecilia「被除名」，對於不再被冠「女神」稱號，她反而鬆一口氣：「從來唔覺得自己係女神，喺我心目中林嘉欣先係女神級。作為一個演員應該要百變，自然唔想畀人定格做某一類型嘅人，依家可以做番自己，輕鬆好多，感覺唔錯。」
圈外男友 唔見面都溝得掂
天王黎明都講過「坎坷過後有艇搭」，如今Cecilia事業愛情兩得意，與圈外男友穩定發展中的她，開腔大談新戀情，她說：「明白大家好關心我，但始終佢（男友）係圈外人，唔想影響佢，同埋我哋都有共識，要以工作為先，希望感情事可以低調處理。」雖然Cecilia講到明要低調拍拖，但受訪期間一提男友即甜笑，更不禁洩「蜜」：「好多謝佢陪我度過唔開心嘅時刻，做藝人工作時間唔穩定，平時難抽時間見面，但佢好體諒我。（冇得見點維繫感情？）唔一定要見面，有時可以傾電話，最緊要唔好掛住忙就唔溝通。」
恨做歌手出碟
出道只有短短兩年的Cecilia，試過拍電影及電視劇，新一年她希望有更多新挑戰，包括出唱片做歌手：「我一直對音樂方面好有興趣，細細個已經學彈鋼琴，最近就學埋彈結他，之後打算跟老師學唱歌。（想出碟做歌手？）如果有機會都想，因為想咩都嘗試吓，不過現階段要學好唱歌先，同埋都想嘗試作曲，希望有朝一日可以畀大家聽到我嘅作品。」
文：專案組
攝：張福宏
服裝：Tsumori Chisato @ IT
髮型：Will Yu @ the attic
化妝：Will Wong @ WiLL makeup