岑日珈坐頭等機艙 晒名牌袋炫富

岑日珈上載坐頭等機艙的照片，身旁的名牌手袋成為一大亮點。

追求者闊綽

身在台北旅遊的Angie昨日回覆：「諗住復活節假期出埠休息吓玩吓，因為決定得好急，太遲訂唔到經濟艙，就焗住買頭等，我都係第一次坐頭等，咁咪諗住影吓相留念。」她大方透露名牌手袋是追求者送：「係生日禮物。（你同男朋友去旅行？）我未有男朋友，係自己一個人去，台灣都有啲朋友，順便去搵吓佢哋。」追求者出手闊綽，可是傳聞中照顧她的「老闆」？她說：「唔係老闆，係個男仔。（富二代？）唔算係富二代，係自己努力工作嘅男仔。（唔怕被話你畀人包養？）唔怕，因為女生應該都喜歡收禮物，我唔會咁樣諗。」

• 自稱單身的岑日珈表示是獨遊台灣。

冇需要抽水

此外，Angie曾經寸爆不和的鄭俊弘、何雁詩，反被人指她抽水，日前她在網上留言：「從來沒想過要全世界也要喜歡我。」她坦言是有感而發：「內心仲有啲唔開心嘅，因為某件事被人覺得我係抽緊水，我覺得我冇需要抽嗰個人水，即使我冇做錯任何嘢，人哋都唔會鍾意我，所以我覺得毋須做任何嘢討人喜歡。」

文：音樂組