藝人曾志偉前晚開P慶祝64歲生日，兒子曾國祥孖住女友王敏奕到場。然而王敏奕事後於IG晒出自己與志偉兩父子的合照，更留言稱呼志偉為「老爺」：「我們的眼都笑成了一條線，老爺生日快樂！」此話一出即惹來不少網民以為她已經成為曾家新抱，故不斷留言恭喜她！
曾國祥昨日接受電話訪問時否認與女友拉埋天窗，又稱有好消息會通知大家：「冇呀，冇咩喜事。佢都係跟人叫『老爺』，大家成日都『老爺』、『老爺』咁嗌我老竇，所以大家唔好諗太多，有會話畀大家知。」談到志偉日前出席慈善素宴活動時獲送上生日蛋糕，而長居外地的國祥媽媽宋麗華亦罕有現身及陪老公上台點蠟燭及切蛋糕。國祥稱媽媽一向作風低調：「當晚主要係慈善晚宴，幫一間寺院籌錢。我媽咪一路都幫手做好多慈善同埋佛教素宴，嗰啲佢成日都會去，但一般Party同頒獎典禮佢就唔會去。」