抱「小王子」出院 翠翠欽點老公做夜更保母

35歲前港姐葉翠翠本月10日為老公周曉東（Raymond）誕下囝囝「小王子」，翠翠昨日在老公陪伴下出院，見翠翠精神飽滿，又沒有水腫，而周曉東則負責抱BB，不過未踏出門口就電話響起，見他一手抱B，一手拎起電話傾，頓時「型爸」上身，更兩度錫翠翠面頰，未幾翠翠接受訪問，周曉東抱B上車等候，見他雙眼望實BB，不時冧笑，父愛滿溢。

冇拎過奶樽餵奶

翠翠笑指老公要BB與他同名，改乳名「小東東」及「Raymond Junior」。問可有足夠時間休息？她說：「呢幾日唔夠，係攰啲，姑娘每隔一個鐘就同我量血壓。」目前仍未可以餵全人奶的她，要補給奶粉，又笑謂老公當BB是屬於他，全程負責餵奶，她笑說：「佢話等我嚟啦，我熟手啲，所以我冇拎過奶樽餵奶，冇掃過風！BB一喊佢就好開心，如果半夜喊，我睇佢仲笑唔笑得出！」未求老公獎勵的她望對方做夜更保母。

翠翠抱着可愛的囝囝，有子萬事足。

產後的翠翠，精神飽滿，又沒有水腫。

Plan定追女

她表示囝囝比預產期早出世而打亂計劃，例如原本預訂的普通單人房無位要臨時改成頭等單人房，擇時辰出世亦被打亂，呻花了不少錢：「其實我都唔知係咪早產，因為BB冇早產會出現嘅問題，我想搞清楚係咪我大頭蝦，下一次再生唔會再犯錯！」揚言待囝囝一歲後再追女的她，笑指自己的港姐后冠可留給囡囡，生仔就只會令囝囝送給老婆。而為囝囝舉行百日宴或搵學校都要再考慮。另外，翠翠在個人社交網站上載回家後抱B玩貓狗的短片，指要讓家中的小動物認識家庭新成員。

文：影視組