畀女飛至親亡何遠東諗過自殺
無綫藝員何遠東外形肥嘟嘟喜感十足，但他在前晚播出的劇集《心理追兇Mind Hunter》中演技大爆發，記起自己弒母時一幕爆喊戲，令觀眾睇得揪心裂肺！人氣急升的他昨日重遊大埔成長地，勁受歡迎狂被街坊集郵！不過提起演藝低潮期，又連環遭遇被女飛及親人過身，東東不禁傷感爆喊，自爆想過尋死！
由馬國明、楊明與蔡思貝主演的無綫劇集《心理追兇Mind Hunter》劇情緊湊，劇中飾演「阿文」的肥仔藝員何遠東失控殺害惡母馬海倫，前晚一集在馬國明引導下終於記起此事！大批網友激讚東東弒母時喪心病狂，喊戲則夠催淚，一日間在網上獲洗版式狂讚，入行九年演盡閒角的東東終於吐一口烏氣！
重遊大埔 街坊集郵
東東昨日到成長地大埔玩街訪，大批街坊主動上前盛讚他的演技感人又索合照，紛紛高呼「何遠東支持你！」其後，他走入室內街市，菜檔姐姐冧讚東東好仔又好戲，又有老闆娘讚他孝順，經常陪媽咪買餸！甚得民心的東東笑指若不做演員，可轉行做區議員！
曾是演藝學院高材生的東東同時演舞台劇及拍劇，舞台上曾提名「劇帝」，相比在電視圈卻鬱鬱不得志，更在台慶夜與吳業坤齊齊扮棋！眼見對方極速升呢，自認「葡萄」的東東曾檢討自己是否唔得：「聽過好多冷言冷語，話我只係識搞笑，但又唔係真係好笑喎！今次好似一鋪過所有嘢返晒嚟咁！睇到大家留言，我真係好感動！」受訪期間東東四度落淚，有感觸亦有傷痛，首先他多謝《心》劇監製、導演、助導、「母親」馬海倫以及陳豪與馬國明的鼓勵，提到演藝學院導師栽培時更一度決堤。
提起父母無條件支持，東東忍不住又落淚：「好感激佢哋冇反對過我演戲！當年演藝學費五年要廿萬，佢哋即刻話幫我！畢業之後我乜都做，收入唔算差，但捱到有次爭啲暈低，Check到類似有脂肪肝問題。」2013至2015年是東東的低潮期，事業停滯不前，又先後被另一半拋棄及愛錫他的阿姨過身，提到往事又一次爆喊：「分手好痛苦！我仲要返公司拍開心嘢，半夜睇唔開就搵朋友訴苦，個世界好似咩都冇晒咁，曾經想過死！諗過好多自殺方法，我未係信基督，但有晚喺窗外見到十字架，我喊晒！之後慢慢放下。至於阿姨過身一事我到依家都未接受到，拍《心》劇場認屍戲，我真係經歷過，嗰45分鐘我喊唔停！阿姨係最支持我嘅人，遺憾我好似未報答晒佢恩情咁。」
「惡媽」讚乖仔堅喊得
劇中「惡媽」馬海倫亦讚東東勤力乖仔，笑言要請他食飯：「弒母戲當日好熱好辛苦，阿仔（何遠東）畀我又鬧又搣，佢都冇怨言，喊戲都唔使眼藥水，冇得彈！（你都好辛苦！）係呀！我發燒打針仲失埋聲，拍死屍戲要着住Bra Top瞓喺鐵板床上，仲拍到凌晨兩點幾，最後冷親！」
文：影視組
攝：唐豁莊