岑日珈對號入座「唔知紅幾日？」

早年與鄭俊弘（Fred）放狗鬧出緋聞的歌手岑日珈（Angie），直認當年因緋聞被同為新人的何雁詩寸佢放料，將她踢出一班新人歌手嘅手機群組！

日前無綫導演Jacky Lee在社交網寫下感言撐「雁鄭戀」，有Fred唱片公司人員留言：「通常係啲唔紅嘅人先會鍾意抽人水。」之前寸過Fred「潛水」的Angie即回應：「近幾日2個好hit嘅人唔知hit幾耐呢？好多朋友仔都講佢哋壞話，紅到呢……唔知紅幾日呢？」擺明暗寸「雁鄭」。反而何雁詩EQ好高，見到Angie留言亦完全當透明睇唔到，還感激Jacky導演力撐。