陳凱琳有「嘉」庭計劃 至少生兩個

【陳柏宇澳門直擊】藝人陳凱琳（Grace）、林盛斌（Bob）及徐榮等昨日到澳門出席新片首映禮，Grace笑稱與徐榮囝囝「拍拖」到場，大讚他有風度又可愛，又指男友鄭嘉穎不會呷醋。鍾意小朋友的她直言想生B組織大家庭：「至少生兩個！（幾時生？）結咗婚之後！（有冇話幾多歲前？）細個就會諗呢啲，大個咗就覺得工作緊要啲，所以順其自然啦！（同嘉穎有計劃？）有傾過，大家都有共識，佢都好鍾意小朋友，變咗呢樣嘢好夾。」談到嘉穎現年47歲，問會否擔心對方不夠體力幫小朋友「放電」？她說：「仲好啦，做吓運動，好過留喺屋企睇電視。（會周身骨痛、肩周炎！）唔好咒佢啦！」問會否效法郭富城和方媛秘密入紙註冊結婚？她表示沒有所謂，暫時未考慮過類似問題。