拖男友煙韌睇樓 李旻芳戀情曝光買六合彩博「上車」
無綫新「咪神」、擁有34C上圍的李旻芳（Lucy）深得宅男歡心，惟「咪神」早已成功封盤，日前與《東張西望》主持男友黃耀英（Darren）秘密睇樓，估不到睇樓已有高潮，兩口子禁不住在街頭煙韌。期間更買六合彩博中獎，希望早日「上車」結婚！
29歲藝人李旻芳去年擔任無綫節目《東張西望》外景主持，憑34C激凸上圍獲封為新一代「咪神」，成功上位的她工作一浪接一浪，接連演出旅遊節目《3日2夜》及電視劇，「錢」途無限！事業得意之際，原來一直宣稱單身的Lucy早已被「私有化」，與同為《東張》主持、現年34歲的黃耀英蜜運中。據知二人有感踏入適婚年齡，加上拍拖三年感情穩定，故早已有結婚打算，而兩口子近日被發現秘密睇樓，應該是計劃先築愛巢。
專睇細價唐樓
日前二人現身地產舖，在店舖門前左看右看，並不時密斟討論。由於二人事業剛起步，為減輕供樓壓力，他們特別留意400萬以下的「上車推介」樓盤，更對樓齡高的唐樓情有獨鍾，貪其樓價合理易「上車」。不少年輕人的夢想是成功置業，惟樓價高難以儲首期，兩口子途經馬會更順道買六合彩實行「刀仔鋸大樹」，望中獎幫助置業。
十指緊扣行街
眼見當日未被途人認出，二人亦放下戒心，十指緊扣甜蜜逛街，並在書報攤前揭雜誌「打書釘」，果然為儲首期慳到盡，Darren更全程攬實女友，相當冤氣！期間Lucy「女王」上身，突然捉實男友的衣領，原來貪靚短裙上陣的她抵不住寒冷，收到柯打的Darren乖乖聽命，立即脫下外套並細心為女友披上。
文：專案組