「跨世代男神」5月蟹咒 秋官發盈警股民睇路

講真，Nuts哥對秋官冇任何不滿，即使有人統計過，「丁蟹效應」超過30次中到應一應，但作為成熟嘅投資者，Nuts哥冇怪秋官，因為投資人士除咗Call之外，係可以Put o架嘛！比起「丁蟹效應」，Nuts哥更加相信「你要坐Benz靠自己個腦！」，乜都賴，秋官餵埋你食好唔好？

風流倜儻型足50年

其實秋官呢位N世代男神認真厲害，由1967年同陳寶珠合作首部電影《黑煞星》，到50年後嘅今日，由排骨秋、大俠秋、扮嘢秋到丁蟹秋，佢依然不言休！無論扮演張無忌、楚留香、陳家洛定乾隆，秋官都係咁風流倜儻，據講佢為咗一個眼神，可以練足半年，為求動作瀟灑儒雅，甘於對鏡不斷練習，難怪冧盡兩岸三地萬千少女心！現實中嘅佢仲經歷三段婚姻，俘虜咗金牌司儀同台灣女星，即使秋官今天已年屆70，但唔使人扶，唔使撐拐杖，兼夾仲保持到體態與狀態魅力無限，好似太陽咁溫暖，試問當今娛樂圈有幾多個有咁嘅魔力？

當然，扮過澤田研二、米高積遜、郭富城嘅秋官，扮嘢才華唔簡單，但最令Nuts哥寫個「服」字嘅係，做慣大俠嘅佢後來一轉戲路，演活咗野蠻暴戾、滿口歪理、無賴中嘅無賴－丁蟹！雖然香港今時今日滿街都係蠻不講理嘅丁蟹，但當年根本冇辦你跟，不過秋官依然將呢個角色演成經典，事實上，要遊走於正邪之間，演大俠與演無賴都拿捏精準絕非易事，就如小說家卡夫卡講過：「邪惡太了解善良，但善良毫不了解邪惡。（Evil know of the good, but good does not know of evil.）。」本名黃可忠嘅鄭少秋，曾被同父異母妹妹黃晴雯爆料：「他知道我媽身體不好，特別請人幫我媽按摩、治療」、「他到台北拍劇，特地趁空檔請我和母親到飯店聚餐」，百善孝為先，可想而知，秋官當年演丁蟹下過一番苦功！

唔信邪隨時「望鄉」

雖然秋官講明唔識唱乖女鄭欣宜嘅大熱金曲《女神》，但呢位「跨世代男神」大把名曲，完全應付不同場合需要，好似新年應景要唱「年年歡樂，歡樂年年」，劈酒Happy當然唱爆「飲勝咁至醒」，如果熊年殺到埋身，秋官一樣有歌唱到，嗰首熱爆《香港料理》就有句：「不如儲錢過二千年囉！」呢句絕對充滿大智慧，佢唔係叫你揸貨過2000年，注意不是Year 2000年，而係2000 Years，講嘅係數字唔係年份，咪以為揸住唔放就得，佢係勸你喺高位要識先行沽貨食胡，袋袋平安好過，跟手數住銀紙等睇「丁蟹效應」有幾靈！之後又喺低位入番，咁至可以搵到二千年嘅錢嘛！至於唔信佢嗰套、特別唔信邪嘅股民，揸住成倉蟹貨，搞到入秋都返唔到家鄉，到時想唔唱《天涯孤客》嗰句：「秋深倍念家鄉，最斷腸！」都唔得啦！

Nuts哥