黎瑞恩再戰樂壇囝囝好奇Check行蹤
育有一對子女的歌手黎瑞恩（小恩子）早前推出新專輯，她認為現今樂壇環境與昔日的輝煌時期差別較大，事隔14年再推出唱片的她坦言有壓力，幸有一對子女的鼓勵及支持。2014年與曾智明離婚的她承認當時很嬲對方，但經過多年洗禮後心中已不再有怒火，現時視前夫為家人：「永遠都唔可以分割。」並強調沒打算再婚，暫以一對子女為重。
黎瑞恩早前相隔14年後推出新專輯，坦言壓力不小：「梗係有（壓力），始終人哋對你有期望，歌迷會覺得阿恩再唱歌唔知唱成點。以前細個做騷寓工作於娛樂，完全冇諗點唱好隻歌，有得表演就做，依家唔同，會諗好多嘢。」她又認為當今與昔日樂壇相差甚遠：「依家出番嚟好似新人咁，環境唔係我熟悉嘅，唔同晒。當年出道好快，呢頭錄完音，嗰頭做完宣傳又再錄音，依家有少少慢。（今次入錄音室有冇腳震？）腳震就冇，喉沙就有！一入到去錄音室就喉嚨痛，係咪方位唔好同磁場唔OK？可能唔熟習又緊張，有3、4次都因為喉嚨痛錄唔到收場，之後放鬆咗先搞掂。」雖然再戰樂壇壓力不小，但幸而一對子女都很支持她再推出專輯，小恩子說：「阿仔對我嘅行蹤好有興趣，會問我做緊乜？點解影相影全日？」
睇騷鑽研唱功
個性認真的小恩子坦言信心隨年齡而減弱：「其實我可以講『使乜理人點睇自己？』自己又唔使咁大壓力，公司又冇話要點樣，可以當玩嘅心態去做，但自己衰認真。」由於已多年沒有推出唱片及演出，問到錄音前可有上堂練唱歌？她說：「冇，係咪好得意？我成日去睇演唱會。（偷師？）睇完會問『點解佢唱到咁高音？個聲喺邊發出？』我會研究，唔係因為我要再出唱片而研究，而係我一向都鍾意。」
小恩子在新專輯翻唱了謝安琪、組合C AllStar、連詩雅及陳柏宇等新一輩歌手的作品，她表示一直有留意本港樂壇：「我都鍾意聽歌，都係樂迷。（點解會揀佢哋啲歌嚟翻唱？）因為唱卡拉OK時中間有廣告位，好多時不停播嗰期歌手啲宣傳歌，通常係播半首，但我又想知成首係點唱，旋律好好就鍾意咗。」問到是否習慣現時的宣傳方式？她說：「唔係好習慣，對住鏡頭仲有少少生硬，不過都好咗啲。」
見過鬼怕黑唔諗第二春
小恩子與前夫曾智明維持了12年婚姻生活，惟2014年宣布離婚，一對子女跟隨媽咪生活。最近小恩子不時被傳有個富商男友，問到可有考慮再婚？她說：「我相信絕對唔會，但又唔可以講絕對，暫時唔會，到呢個時候唔好叫我結婚啦，見過一次鬼都怕黑。」她坦言最緊要是另一半與仔女溝通到：「佢要好錫我嘅仔女，如果唔係唔使諗！（試過有另一半？）冇，好難，我好多男性朋友，個個都係兄弟，成日聽啲唔識嘅男性朋友講『嘩！聽講你好多男朋友。』黐線！我幾時有好多男朋友？」
問到會否認真搵個伴？她說：「呢啲冇得認真，愈去搵就愈冇，等上天安排。依家聽天由命，成日覺得諗好多嘢、我想咁，但最後結果都唔係我想嘅。（真係冇追求者？）真係有好多男性朋友好錫我，但冇話係咪鍾意我，一諗呢樣嘢即刻好尷尬，自然啲，唔係好刻意追尋。」她大讚一對仔女懂事：「佢哋成日講媽咪有我哋錫咪得囉，我話『梗係你兩個排第一啦！』（仔女多唔多見爸爸？）我哋成日見阿爺、阿嫲，會探佢哋。」
小恩子坦言當年婚變時心情差：「嗰刻梗係好衝動同嬲，依家過咗咁多年，覺得乜都沖淡晒啦，當佢係家人咁，會問候吓。（有同前夫聯絡？）都有，永遠都唔可以分割呢件事，因為有小朋友。冇小朋友可以一刀兩斷，但佢哋始終只得呢個爸爸同呢個媽媽。」
大女澳洲留學識男友仔冇咁易！
小恩子與前夫曾智明於2002年拉埋天窗後努力造人，三年抱兩，小恩子於2003年誕下大女曾凱栭，翌年再誕下細仔曾浩儒，一對子女現已升中，大女更赴澳洲留學，小恩子表示女兒非常享受在當地生活：「佢好鍾意，亦好開心。開頭都擔心佢掛住屋企會喊，不過佢完全冇，仲日日打幾個電話返嚟分享校園開心事。」
提到13歲的女兒凱栭亭亭玉立，是否有拍拖？小恩子哈哈大笑，說：「冇，因為佢間學校係女校。（專登揀嘅？）都係嘅。（有冇視察學校附近咩環境？）冇，佢係寄宿嘅，冇人湊佢係出唔到去嘅，咁就OK！」
Get ready殺入紅館
小恩子於2002年舉行處女演唱會後隨即宣布暫別樂壇，問到為何想重返樂壇？她說：「我都唔知點解，好神奇，覺得係上天一早安排畀我。1997年我冇唱歌，去做保險，做咗5年突然有個人話幫我開演唱會，嗰個就係張耀榮先生，真係好多謝佢。當時我話『張生唔好呀，會蝕死你』，但佢話唔驚，之後唔知發生啲咩，因為個唱係由我朋友去傾，最後去咗另一間主辦單位，就係丘亞葵，好感謝佢。」
提到所屬的唱片公司Neway正式為她入紙申請紅館檔，是否已準備好踏上紅館舞台？小恩子坦言：「都有跑步練氣，唔使特登減。一有壓力就嚟，冇壓力就放鬆暴飲暴食，有壓力會不自覺地兩日唔食嘢都唔知。」
文：音樂組
攝：劉智源