羅仲謙造人心得：要放鬆
羅仲謙近來中、港兩邊走，每次回港都來去匆匆，愛妻號的他更向老婆楊怡大派定心丸，日日玩視像，影埋居住環境，叫老婆不用探班，以免老婆悶親兼食塵，認真細心！
藝人羅仲謙昨日出席《Montblanc全新革命性腕錶發布會》，品牌除送上全新Montblanc Summit智能腕錶給謙仔外，更送給其太太楊怡，夫妻裝一人一隻。他表示前晚在無錫拍攝電影《西遊記：女兒國》後搭早機返港，逗留至19號又要走，會先安排一家人飯敍。經常中、港兩邊走的他說：「留香港2、3日，就走3、4個月，呢種生活維持咗一年。（返嚟就造人？）大家都想要小朋友，但唔可以強求，要放鬆。」
努力賺人仔
問到太太楊怡可有到內地探班？他說：「叫佢唔好，都有嘅，但時間排得密，佢嚟會好悶，上面沙塵滾滾，唔想佢吸咁多塵，留港休息。（太太唔放心？）唔會，我哋日日視像，畀佢睇埋居住環境，佢對我好有信心。」他透露為電影要留在內地拍到四月，問到是否搵人仔？他直言：「有機會，唔會怕辛苦，會好好把握。」談到早前飛去睇太太的舞台劇送驚喜，問到會否再送，他笑指驚喜多就不驚喜。至於會否拍無綫劇，他則表示明年先會在香港，見到張衞健回巢拍劇覺得好吸引。
文：名人組