祖兒情迷曹星如曲線向師兄示愛
天后容祖兒昨晚打扮靚靚出席店舖活動，講到該店其中一個系列的精品以威尼斯為主題，她表示去過威尼斯兩次，但都是蜻蜓點水地玩，問到之後可會想與男友劉浩龍（師兄）去？她說：「冇乜所謂，最緊要有時間。」講到日前她跟奪得21連勝的「神奇小子」拳王曹星如合照，她坦言很欣賞對方，又大讚對方有自己最喜愛的單眼皮，事有湊巧地師兄亦是單眼皮男生，一臉冧爆的祖兒擺明曲線向男友示愛！
提到即將舉行的Side Track演唱會，祖兒謂籌備得如火如荼，又笑言今次擔任演唱會的意念總監好大壓力，希望大家會喜歡。愛錫歌迷的她亦提到很多人投訴買不到門票，故考慮尾場做一小段Facebook Live直播演唱會。
容媽媽咩都擔心
祖兒又講到早前患癌的容媽媽現時身體舒服些：「冇咁病，又開心。（好番晒？）未，仲食緊藥，但自己心情好啲，所以盡量多啲陪佢。」記者打趣容媽媽抱孫應該最開心，祖兒則說：「唔一定，佢咩都擔心我。」她又自爆細佬最近身體檢查，但被驗出有脂肪肝及腎臟欠佳：「可能佢飲得少水同食太多肉，又夜瞓。（擔心佢？）擔心呀，希望佢醒醒定定。」
文：音樂組