兆尊冇改電話歡迎聯絡 裝香問吓祥哥先！

藝人鄧兆尊與林作昨日錄影ViuTV節目《晚吹─總有一件喺左近》，期間兆尊被問到有否與母親祥嫂聚會？他自言處被動，但強調冇改電話：「暫時冇，佢鍾意見就搵我，我冇改電話，佢冇主動搵我。（你做主動？）我唔會！兩邊都要睇住（意指祥嫂及鄧小艾等家人）。（佢腰痛到要打止痛針？）冇辦法，控制唔到。（關心佢？）唔使啦！佢能收能放，仲叻過我。」問到有冇留意祥嫂日前向黃夏蕙的慈善基金捐款一千萬，對方透露有意開老人院？兆尊讚好：「幾好啊！兩萬蚊一個床位，老人院係門好生意。」

連祥嫂都相處到，有咩難倒我！

兆尊透露今次獲主持蘭子邀請，節目中將無所不談，包括與三位女友的相處之道。兆尊直言講異性關係「難佢唔到」：「照直講啫！（你有三位女友會有排講？）唔會！都係同一樣嘢，都係女性動物。（難唔倒你？）我連我媽咪（祥嫂）都相處到，有咩難倒我？」被問到是否打算復出幕前？他稱隨緣，亦接下了網絡電影工作。

唔係平輩，點解要我搵佢！

其後，記者聯絡祥嫂接受電話訪問，問到兆尊指可以隨時聯絡一事？她稱要「裝香」去徵求先夫新馬師曾的意見：「我唔係佢個女，又唔係同佢平輩，點解要我搵佢呢？做人要講禮、尊卑。（兩母子唔打算再聯絡？）最好唔好搵，唔想佢難做，再講落去今晚我要裝支香問吓祥哥好唔好先，我都要徵求先夫嘅意見。」對於鄧兆尊有意復出，祥嫂則指是好事，希望大家給予鼓勵。對於兆尊指她跟黃夏蕙搞老人院是一門好生意，祥嫂即澄清：「我唔係搞生意，我只係畀一千萬黃夏蕙個慈善基金，等佢每個月可以攞十萬蚊用，我只係畀筆錢去多謝陪咗我五十年嘅好朋友。」